ޕަރީނީތީ ރަނގަޅު މީހުން ފާހަގަ ކުރަނީ އެމީހުންގެ ނިޔަފައްޗަށް ބަލައިގެން
އަހަރުމެންގެ ތެރެއިން ބައެއް މީހުންނަކީ އެހެން މީހުންގެ މޫނަށް ބަލާލާފައި ވިޔަސް އެމީހަކީ ކޮން ކަހަލަ މީހެއްކަން ދެނެ ގަންނަ މީހުންނެވެ. ނަމަވެސް ބޮލީވުޑްގެ އެކްޓްރެސް ޕަރިނީތީ ޗޯޕްރާ މުޅިން ތަފާތެވެ. އޭނާ އެހެން މީހުންނާ ބެހޭގޮތުން ގޮތް ނިންމަނީ އެމީހުންގެ ނިޔަފައްޗަށް ބަލައިގެންނެވެ.
ކޮމީޑިއަން ކަޕިލް ޝަރްމާ ހުށަހަޅައިދޭ "ދަ ކަޕިލް ޝަރްމާ ޝޯ" ގެ މެހެމާނަކަށް ޕަރިނީތީ އެރުމުން، އޭނާއާ ބެހޭގޮތުން އިވިފައިހުރި ބައެއް ވާހަކަތައް ކަޕިލް ވަނީ ހިއްސާކޮށް، އެއީ ތެދު ވާހަކަތަކެއްތޯ ސުވާލު ކޮށްފައެވެ.
އެގޮތުން ކަޕިލް ކުރި އެއް ސުވާލަކީ، މީހެއްގެ މިޒާޖު ދެނެގަންނަން ޕަރިނީތީ އެންމެ ފުރަތަމަ ބަލަނީ އެމީހެއްގެ ނިޔަފައްޗަށް ތޯއެވެ. ޖަވާބުގައި އޭނާ ބުނީ އެއީ ތެދެއް ކަމަށާއި އެއީ އޭނަ ކުރާ ކަމެއް ކަމަށެވެ.
ޕަރިނީތީ ބުނީ އެއީ އޭނަގެ ބައްޕަ ކައިރިން ދަސްކުރި ކަމެއް ކަމަށެވެ. އޭނަގެ ބައްޕަ ބުނި ގޮތުގައި ނިޔަފަތި ސާފުކޮށް ރީތިކޮށް ހުންނަ މީހުންނަކީ ރަނގަޅު މީހުން ކަމަށާއި ނަމަވެސް ނިޔަފަތި ސާފު ނުކޮށް ބަހައްޓާ މީހުންނަކީ އުޅުން ރަނގަޅު ނޫން މީހުން ކަމުގައި އޭނަގެ ބައްޕަ ބުނި ކަމަށް ވެސް ބުންޏެވެ.
ޕަރިނީތީ ގެ މިހުނަރާ ބެހޭގޮތުން އެނގުމުން އޭނާއާއެކު އެޝޯއަށް ދިޔަ ސިދާތު މަލޯތުރާގެ އިތުރުން ކަޕިލް ވެސް ހުރީ ހައިރާން ވެފައެވެ.
