ހައިލަމްގެ މައްޗަށް ވިޔަފާރި ކުރި ކަމުގެ ތުހުމަތު، ޖިނާއީ ތުހުމަތަށް އޭނާ އިންކާރު ކުރޭ!
ކްރިމިނަލް ކޯޓުގެ ކުރީގެ އިސް ގާޒީ އަހްމަދު ޙައިލަމް ފުލުހުންގެ އިދާރާއަށް ރޭ ހާޒިރުކޮށްފިއެވެ.
ހައިލަމާ ގުޅޭގޮތުން ތަހުގީގު ކުރަމުންދާ މައްސަލަ އަކީ ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީ، އޭނާގެ އެކައުންޓަށް ދެ ލައްކަ ރުފިޔާ ޖަމާކުރެއްވި މައްސަލައެވެ. އެކަމުގައި މަނީ ލޯންޑަރިންގެ އަމަލެއް ހިމެނޭތޯ ބެލުމަށް އެމްއެމްއޭގެ ފައިނޭންޝަލް އިންޓެލިޖެންސް ޔުނިޓުން ފުލުހުންނަށް ފޮނުވިއެވެ. ނަމަވެސް ފުލުހުން ބެލިބެލުމުން އެކަމުގައި މަނީ ލޯންޑަރިންގެ އަމަލެއް ނެތް ކަމަށް އެނގިފައިވާ ކަމަށް ފުލުސް އޮފީހުން ނުކުމެވަޑައިގެން ނޫސްވެރިންނަށް މައުލޫމާތު ދެއްވަމުން ހައިލަމް ވިދާޅުވިއެވެ.
ފުލުހުންގެ އިދާރާއިން ނިކުމެ މީޑިއާތަކާއި ވާހަކަ ދައްކަވަމުން ހައިލަމް ވިދާޅުވީ ފުލުހުން އޭނާގެ މައްޗަށް ތުހުމަތުކުރަނީ ފަނޑިޔާރެއްގައި މަގާމުގައި ހުރެ ވިޔަފާރުކުރުމުގެ ކުށްކަމަށެވެ. ހައިލަމް ވިދާޅުވީ ފުލުހުން ތުހުމަތުކުރާ ގޮތަށް ވިޔަފާރި ނުކުރައްވާކަމަށެވެ. އަދި ފަނޑިޔާރުން ވިޔަފާރުކުރުމަކީ ރާއްޖޭގެ ވިޔަފާރީގެ ނިޒާމުގައި އެއްވެސް ވަރަކަށް ކުށެއްކަމަށް ބަޔާން ނުކުރާކަމަށެވެ. ފަނޑިޔާރުންގެ ޤާނުނުގައި މަނާ ވަނީ ފަނޑިޔާރުން ވިޔަފާރީގައި އަމަލީ ގޮތުން ބައިވެރިވުންކަމަށާއި ފުލުހުން ތުހުމަތުތަކަށް އިންކާރުކޮށްފައިވާކަމަށް ހައިލަމް ވިދާޅުވިއެވެ.
ހައިމަލް ވިދާޅުވީ ފުލުހުން ތުހުމަތުކުރާ ގޮތަށް ވިޔަފާރިއެއް ވެސް ނުކުރައްވާ ކަމަށެވެ. އޭނާ ވިދާޅުވީ ފަނޑިޔާރުކަމުގައި ހުރެގެން ކުރި ވިޔަފާރިއެއް ބެލުމުގެ ކުރިން، ފަނޑިޔާރަކަށް ވެ ހުރެ ވިޔަފާރިކުރުން މަނާވާ ގާނޫނީ ހަމައަކީ ކޮބައިތޯ ބަލަންޖެހޭ ކަމަށެވެ.
"ފުލުހުން ވިދާޅުވަނީ ފަނޑިޔާރުންގެ ގާނޫނުގެ 29 ވަނަ މާއްދާގެ (ހ) ގެ އަށް ނަންބަރުގައި ބަޔާންކޮށްފައި ވަނީ ފަނޑިޔާރަކު ވިޔަފާރިކޮށްގެން ނުވާނެ ކަމަށް. އެހެންވީމަ އެ އަސާސާ ޚިލާފުވީމަ، ނުކުރަން ބުނެފަ އޮތް ކަމެއް ކުރީމަ ގާނޫނުލް އުގޫބާތުގެ 533 ވަނަ މާއްދާގައި ބަޔާންކޮށްފައިވާ ގޮތުގެމަތިން ގާނޫނު ހިންގުމަށް ހުރަސްއެޅި ކަމުގެ ތުހުމަތޭ އަޅުގަނޑުގެ މައްޗަށް މިކުރެވެނީ،" ހައިލަމް ވިދާޅުވިއެވެ.
އަނބުރާ ދައްކާގޮތަށް އަލްހާން އަތުން ނެގި ފައިސާ އަދި ދައްކާފައެއް ނުވާނެ ކަމަށާއި އެ ފައިސާ ލިބުނުހާ އަވަހަކަށް އެ ދައްކާނެ ކަމަށް ހައިލަމް ވިދާޅުވި އެވެ.
Ads by STO
