ޖަލުގެ ޖާގާ ނުބައްދަލު އަދަދަކަށް މީހުން އެބަތިބި: އިމްރާން
ރާއްޖޭގައި ގައިދީން ބޭތިއްބުމަށް ހަމަޖައްސާފައިވާ ޖަލުތަކުގައި ހުރި ޖާގަތަކަށްވުރެ 40 ޕަސެންޓު އިތުރަށް ޖަލުތަކުގައި މީހުން އެބަތިބިކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ރާއްޖޭގެ ޖަލުތަކުގެ އާބާދީ އާއި ޖަލުތަކުގެ މިހާރުގެ ހާލަތާއި ގުޅޭގޮތުން މައްޗަންގޮޅި ދެކުނު ދާއިރާގެ މެމްބަރު އަޙްމަދު ހައިތަމް ކުރެއްވި ސުވާލަށް ޖަވާބު ދެއްވަމުން މިނިސްޓަރު އިމްރާން ވިދާޅުވީ ކަރެކްޝަނަލް ސާވިސްގެ ބެލުމުގެ ދަށުން ރާއްޖޭގައި މިވަގުތު ހުރީ ހަތަރު ޖަލެއްކަމަށެވެ. މިޖަލުތަކުގެ ޖާގައަކީ 1300 މީހުންކަމަށްވިޔަސް މި ޖަލުތަކުގައި 1800 މީހުން މިހާރުވެސް އެބަތިބިކަމަށް މިނިސްޓަރ އިމްރާން ވިދާޅުވިއެވެ. މިއީ ޖަލުތަކުގެ ޖާގައަށް ބަލާއިރު 40 އިންސައްތަ އިތުރު އަދަދެއްކަމަށް މިނިސްޓަރ އިމްރާން ވިދާޅުވިއެވެ.
އިމްރާން ވިދާޅުވީ ޖަލުތަކުގެ އާބާދީ މަދުކުރުމަށް ރިހެބިލިޓޭޝަންގެ މަސައްކަތް މިހާރަށް ވުރެ ރަނގަޅު ކުރުމަށް ސަރުކާރުން މަސައްކަތް ކުރަމުންދާ ކަމަށެވެ. އަދި އިތުރު ޖަލުތައް އެޅުމަށް ވެސް މަސައްކަތް ކުރާ ކަމަށް މިނިސްޓަރު ވިދާޅުވިއެވެ.
އިމްރާން ވިދާޅުވީ ޖަލުތަކުގައި މީގެކުރިން ޖަލަށް ލެވޭ އެންމެންވެސް ބޭތިއްބެނީ އެއްކޮށްކަމަށެވެ. އޭގެ ތެރޭގައި ހައްދު ފަހަނަ އަޅާފައިވާ މީހުންގެ ގޮތުތުގައި ފާހަގަކުރެވި ޖަލަށްލެވޭ މީހުންވެސް ތިބެނީ އެހެން ގައިދީންނާއިއެއްކޮށް ކަމަށެވެ. ނަމަވެސް މިހާރު ޖަލުތަކުގެ ޖާގަ ކުޑަނަމަވެސް މިފަދަ ކުށްތަކަށް އަރައިގަނެފައިވާ މީހުން ވަކިކުރެވި ބޭތިއްބެވިފައި ވާނީ އެހެން ގައިދީންނާއި ވަކިންކަމުގައި މިނިސްޓަރ ވިދާޅުވިއެވެ.
ޖަލުތައް އެޅުމުގައިވެސް އަދި ޖަލުތަކުގައި މިހާރުތިބި ގައިދީން މުޖުތަމައަށް ދޫކޮށް ޖަލުގެ އާބާދީ ކުޑަކުރުމަކީ ސަރުކާރުގެ އެންމެބޮޑު އަމާޒުކަމަށެވެ. މިމަސައްކަތް އެންމެ ރަނގަޅަށް ކުރެވޭނީ ފުރިހަމަ ރިހިބިލިޓޭޝަން ޕްރޮގްރާމާއި، ތަމްރީން ޕްރޮގުރާމުތަކާއި އެކުގައިކަމަށްވުމުން، މިކަންކަން ކަށަވަރުކުރުމުގެ މަސައްކަތަކީ އެންމެ ފުޅާކޮށް މިހާރުވެސް ކުރެވެމުންދާ މަސައްކަތްތައް ކަމުގައިވެސް ހޯމް މިނިސްޓަރ އިމްރާން އަބްދުﷲ ވިދާޅުވިއެވެ.
