ތެލުގެ ވަގު ވިޔަފާރީގެ ރިޕޯޓުގެ މައްސަލާގައި ރައީސް ވަހީދު މަޖިލީހަށް ހާޒިރު ކުރުން ގޮވާލައިފި
ތެލުގެ ވަގު ވިޔަފާރީގެ ރިޕޯޓް ކުރީގެ ރައީސް ޑރ. މުހައްމަދު ވަހީދު ފޮރުވާފައިވާ ކަމަށް ބުނެ މަޖިލީހަށް ހުށަހަޅާފައިވާ މައްސަލައިގައި ޑރ. ވަހީދް މަޖިލީހަށް ހާޒިރު ކުރުމަށް ވިލުފުށީ ދާއިރާގެ މެމްބަރު ހަސަން އަފީފް ގޮވާލައްވައިފި އެވެ.
މަޖިލީހުގެ މިއަދުގެ ޖަލްސާގައި މާފަންނު ހުޅަނގު ދާއިރާގެ އެމްޑީޕީގެ މެމްބަރު މުހައްމަދު ފަލާހު ހުށަހެޅުއްވި މައްސަލައިގައި ބުނީ، އެސްޓީއޯ މޯލްޑިވްސް ސިންގަޕޫރިން ހިންގާފައިވާ ތެލުގެ ވަގު ވިޔަފާރީގެ ތަހުގީގު ރިޕޯޓެއް ކުރީގެ ރައީސް ޑރ. ވަހީދު ދައުލަތުގެ ފައިސާއިން ބައްލަވައިގެންފައިވާކަމަށެވެ. އަދި އެ ރިޕޯޓް ފޮރުވާފައިވާ ކަމަށާއި، އެ ރިޕޯޓް ހޯދުމަށް މައްސަލައިގައި ވެއެވެ.
އެ މައްސަލައިގެ ބަހުސްގައި އަފީފް ވިދާޅުވީ މޯކޮމް މައްސަލަ ބައިނަލް އަގުވާމީ އޮޑިޓްފާމަކުން ތަހުގީގުކޮށް އެކުލަވާފައިވާ ރިޕޯޓަކީ ދައުލަތުގެ މިލްކިއްޔާތެއް ކަަމަށާއި އެ ރިޕޯޓް ދައުލަތުގައި ނެތިއްޔާ އެކަން ވާނީ ވައްކަމަަކަށް ކަމަށެވެ. އެ ރިޕޯޓް ވަހީދު ނަންގަވާފައިވާ ކަމަށް ވަންޏާ އެއީ އެމަނިކުފާނު ކުރައްވާފައިވާ ވައްްކަމެއް ކަމަށް ވެސް އަފީފް ވިދާޅުވި އެވެ.
"7 ފެބްރުއަރީ ގައި ވެރިކަން ބަދަލުކުރުމަށް ފަހު އޭރު ވެރިކަމާއި ހަވާލުވެވަޑައިގެންނެވި ޑރ. މުހައްމަދު ވަހީދް ހަސަން މަނިކް މި ރިޕޯޓަށް ހެއްދެވި ގޮތެއް އެބަޖެހޭ މި އިއްޒަތްތެރި މަޖިލީހަށް ވިދާޅުވެ ދެއްވަން. އަޅުގަނޑުމެން މި ކޮމިޓީއަށް އެބަ ޖެހޭ ޑރ. މުހައްމަދު ވަހީދު ހަސަން މަނިކް ހާޒިރު ކުރަން." އަފީފް ވިދާޅުވިއެވެ.
އަފީފް ވިދާޅުވީ އެ ރިޕޯޓް ހޯދަން ޖެހޭ ކަމަށާއި ރިޕޯޓު ފޮރުވަން ދައުލަތުން ފައިސާ ހަރަދުކޮށްފައިވާ އިރު އެ ފައިސާ ހަރަދުކުރުމުގައި ބައިވެރިވި ބަޔަކު ވެސް ހޯދަން ޖެހޭ ކަމަށެވެ. އެ ގޮތުން އެ މައްސަލަ މަޖިލީހުގެ ކޮމިޓީއަކަށް ފޮނުވަން ގަލޮޅު ދެކުނު ދާއިރާގެ މެމްބަރު އަދި މަޖިލީހުގެ ނައިބު ރައީސް އީވާ އަބްދުﷲ ހުށަހަޅުއްވާފައިވާ ހުށަހެޅުމަށް އޭނާ ތާއީދު ކުރެއްވި އެވެ.
ފަލާހް ހުށަހެޅި މައްސަލައިގައި ބުނެފައިވަނީ ބޭރުގެ އެކުންފުންޏަށް ފައިސާދީ އެ ރިޕޯޓް ބައްލަވައިގެންފައިވަނީ ރައީސް ވަހީދާއި އޭރުގެ ބަންޑާރަ ނައިބު އައިޝަތު އާޒިމާ ޝަކޫރު އިސްވެ ހުންނަވައިގެން ކަމަށެވެ. އަދި އެކަންކަން އޭރުގެ ފިނޭންސް މިނިސްޓަރު އަބްދުﷲ ޖިހާދާއި އެމްއެމްއޭގެ އޭރުގެ ގަވަރުނަރު ފަޒީލް ނަޖީބަށް އިނގިވަޑައިގަންނަވާނެ ކަމަށް ވެސް ބުނެފައި ވެއެވެ.
