ކޮވިޑް-19: އަމިއްލަ ސަލާމަތަށް ވިސްނާނަމަ، ވޭޕް ކުރުން އަވަހަށް ހުއްޓާލާ!
ފެތުރެމުން އަންނަ ކޮވިޑް-19 ފަދަ ނުރައްކާތެރި ބަލިތަކުން ރައްކާތެރިވުމަށްޓަކައި، ދުންފަތުގެ އިސްތިއުމާލު ކުރުން ހުއްޓާލުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސް ކޮށްފިއެވެ.
ދުންފަތުގެ އިސްތިއުމާލު ކުރުމާއި ވޭޕް ކުރުންފަދަ ކަންކަމަކީ މީހާގެ ދިފާއީ ނިޒާމު ބަލިކަށި ކޮށްލާ ކަމެއް ކަމަށާއި، ކޮވިޑް-19 ފަދަ ބަލިތަކުން ރައްކާތެރިވުމަށް މިކަންކަން ކުރުން ހުއްޓާލުމަށް އެޗްޕީއޭ އިން ވަނީ އިރުޝާދު ދީފައެވެ.
އެގޮތުން އެޗްޕީއޭ އިން ބުނެފައިވަނީ ސިނގިރޭޓާއި، އީ-ސިނގިރޭޓު، ޝީޝާ އަދި ވޭޕް ފަދަ ތަކެތި ބޭނުން ކުރުމާއި އެކަކު އަނެކަކަށް އެދީގެން ބުއިމުން މިބަލި ފެތުރިދާނެ ކަމަށެވެ.
އެޗްޕީއޭއިން މިހެން ބުނެފައިވާއިރު ދުނިޔޭގެ ސިއްޙީ މާހިރުން ވެސް ބުނެފައިވަނީ ހިތުގެ ބަލިތަކާއި، ފުއްޕާމޭގެ މައްސަލަތައް ހުންނަ މީހަކަށް ކޮވިޑް-19 ޖެހިއްޖެނަމަ ކުރާ އަސަރު ބޮޑު ކަމަށެވެ.
