ޖުލައި މަހުގެ ތެރޭގައި ދެބައިޅު އެއްބައި ރިސޯޓުތައް ހުޅުވާނެ: އަލީ ވަހީދު
ބޯޑަރު ހުޅުވާލުމާއެކު ޖުލައި މަހުގެ ތެރޭގައި ދެބައިޅު އެއްބައި ރިސޯޓުތައް ހުޅުވާނެ ކަމަށް ލަފާކުރެވޭ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅު ވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަލީ ވަހީދު ވިދާޅުވީ ރާއްޖޭގެ ބޯޑަރު ހުޅުވާނެ ތާރީހު އިއުލާން ނުކުރަނީސް ވެސް 41 ރިސޯޓުން ޖުލައި މަހު ހުޅުވާނެ ކަމުގެ ޔަގީންކަން ދީފައިވާ ކަމަށާއި، އަދި 30 ރިސޯޓަކުން ބޯޑަރު ހުޅުވާނެ ތާރީހު ލިބުމުން ހުޅުވާނެ ތާރީހެއް ކަނޑައަޅާނެ ކަމަށް މައުލޫމާތު ދީފައިވާ ކަމަށެވެ.
"ރާއްޖޭގައި 150 ވުރެ ގިނަ ރިސޯޓް އޮޕަރޭޓް ކުރަމުން މި ދިޔައީ. އޭގެ ދެބައިކުޅަ އެއްބައި ރިސޯޓް އޮޕަރޭޝަނަށް ގެންނަން މިދަނީ މަސައްކަތް ކުރަމުން. އަދި ދެން ހުރި ރިސޯޓްތައް އޯގަސްޓްގައި އަންނާނެ. މަދުން ނަމަވެސް ސެޕްޓެމްބަރު އަދި އޮކްޓޫބަރާ ހަމައަށް ވެސް. ނަމަވެސް ޑޭޓް ލިބުމާއެކު ލަހުން ހުޅުވަން ހުރި ރިސޯޓްތައް ވެސް ހުޅުވުން އަވަސް ކުރުމަކީ ވެދާނެ ކަމެއް." އަލީ ވަހީދު ވިދާޅުވިއެވެ.
އަދި ދެން ހުރި ރިސޯޓުތައް އޮގަސްޓު މަހުގައި ހުޅުވުމަށް ހަމަޖެހިފައިވާއިރު، މަދު ރިސޯޓުތަކެއް ސެޕްޓެމްބަރު އަދި އޮކްޓޫބަރުގައި ހުޅުވުމަށް ވެސް ހަމަޖައްސާފައިވާ ކަމަށް އޭނާ ވިދާޅުވިއެވެ.
އަލީ ވަހީދު ވިދާޅުވީ ބޯޑަރު ހުޅުވާ ދުވަހު ފަތުރުވެރިންނާއެކު ތިން ފްލައިޓެއް ރާއްޖެ އަންނާނެ ކަމަށާއި އެ މުއްދަތުގެ ކުރިން ހުޅުވާ ރިސޯޓްތަކުގެ މައުލޫމާތު މިހާރު އެއްކުރަމުން އެބަދާ ކަމަށެވެ. އަދި ރާއްޖޭގައި އޮޕަރޭޓް ކުރާ ހުރިހާ ރިސޯޓްތައް ހުޅުވާ ތާރީހުތައް މިހާރު އަންގަން އެދިފައިވާ ކަމަށް އޭނާ ވިދާޅުވިއެވެ.
