ސެލްޓަވީގޯ އާއި ބާސާ ބައްދަލުކުރާ މެޗުގައި ރާއްޖެ އިސްތިހާރު ކުރަނީ
އަންނަ ހޮނިހިރުދުވަހުގެ ރޭ ބާސެލޯނާއާއި ސެލްޓަވީގޯ ބައްދަލުކުރާ މެޗުގައި ރާއްޖޭގެ ފަތުރުވެރިކަން އަލުން ފެށުން ފާހަގަކުރުމަށް ހަރަކާތްތަކެއް ކުރިއަށްގެންދިއުމަށް ހަމަޖެހިއްޖެއެވެ.
ރޭ ބޭއްވި ނޫސްވެރިންގެ ބައްދަލުވުމެއްގައި ޓޫރިޒަމް މިނިސްޓަރު އަލީ ވަހީދު ވިދާޅުވީ އެ މެޗުގެ ކުރިން ވެސް ރާއްޖެ އިސްތިހާރު ކުރުމުގެ ހަރަކާތްތަކެއް ހިންގުމަށް ފުރުސަތު ލިބިފައި ވުމާ އެކު އެކަން ކުރާނެ ކަމަށެވެ.
"ބާސެލޯނާއާއި ސެލްޓަވީގޯ ބައްދަލުކުރާ މެޗު ފެށުމުގެ ކުރިން ދަނޑުގެ ސެންޓަރ ސާކްލްއަށް އިޝްތިހާރެއް ލުމުގެ ފުރުޞަތު އެބަލިބޭ. ސެލްޓަވީގޯއިން މިހާރު ވަނީ ރާއްޖޭގެ ޓުއަރިޒަމް ޕްރޮމޯޓްކުރުމަށްޓަކައި، އަދި ރާއްޖޭގެ ބޯޑަރ އޯޕަނިންގއަށް މެޗު ފެށުމުގެ ކުރިން އޮންނަ ވަގުތު ވަނީ ޚާއްސަކޮށްދީފައި" މިނިސްޓަރ ވިދާޅުވިއެވެ.
މިނިސްޓަރު ވިދާޅުވީ މެސީފަދަ އެތައް މަޝްހޫރު ކުޅުންތެރިން ފެނިގެންދާނެ އެމެޗު ސެންޓަރ ސާކްލްގައި ރާއްޖެ އިޝްތިހާރުކުރުމުގެ އިތުރުން، ދަނޑުގައި ހުންނަ އެލްއީޑީ ބޯޑުތަކުގައިވެސް ރާއްޖެ އިޝްތިހާރުކުރާނެކަމަށެވެ. އަދި މެޗަށްފަހު އޮންނަ ޕްރެސް ކޮންފަރެންސްގައިވެސް ރާއްޖެ އިޝްތިހާރުކުރާނެކަމަށާއި މީގެ ސަބަބުން ރާއްޖެ ވަރަށް ބޮޑަށް އިޝްތިހާރުވެގެންދާނެކަމަށް މިނިސްޓަރ ދެކެވަޑައިގަންނަވައެވެ.
ރާއްޖޭގެ ފަތުރުވެރިކަން އިޝްތިހާރުކުރުމަށް ސްޕޮންސަކޮށްފައިވާ ސްޕެނިޝް ލަލީގާގެ ސެލްޓަވީގޯއިން ދަނީ ރާއްޖެ އިޝްތިހާރުކުރުމަށް ގިނަ މަސައްކަތްތަކެއް ކުރަމުންނެވެ. ރާއްޖެ އިން ސެލްޓަ ވީގޯއާއެކު ދެމެދު ސްޕޮންސާޝިޕް ހެދުމަށް އެއްބަސްވެފައި ވަނީ އަހަރަކު 900،000 އެމެރިކާ ޑޮލަރަށެވެ.
Ads by STO
