ރިސޯޓުތަކުގައި މަސައްކަތް ކުރާ ދިވެހީންގެ ނިސްބަތް 51 ޕަސެންޓަށް އިތުރުކުރަނީ
ފަތުރުވެރިކަމުގެ ސިނާއަތުގައި ހަރަކާތްތެރިވާ ދިވެހީންގެ ނިސްބަތް 51 ޕަސެންޓަށް އިތުރުކުރާނެ ކަމަށް ޓޫރިޒަމް މިނިސްޓަަރު އަލީ ވަހީދު ވިދާޅުވެއްޖެއެވެ.
ރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަލީ ވަހީދު ވިދާޅުވީ އަންނަ އަހަރުގެ މަސައްކަތްތެރިންގެ ދުވަސް، މެއި މަހުގެ ފުރަތަމަ ދުވަސް އަންނަންވާ އިރަށް، ރިސޯޓުތަކުގައި ދިވެހިން ވަޒީފާ އަދާކުރާ ނިސްބަތް 51 ޕަސަންޓަށް ހެދުމަށް ސާކިއުލާ އިސްލާހު ކުރާނެ ކަމަށެވެ.
ރާއްޖޭގައި މިހާރު އޮތީ 2012 ވަނަ އަހަރު ނެރުނު ސާކިއުލާއެއް ކަމަށާއި އޭގައި ރިސޯޓުތަކުގައި ދިވެހިންގެ ނިސްބަތް ހުންނަން ވާނެ ކަމަށް ކަނޑައަޅާފައިވަނީ 45 އިންސައްތަ އަދި ބޭރު މީހުން 55 އިންސައްތަ ކަމަށް އޭނާ ވިދާޅުވިއެވެ.
"އާ ވެެގެންދާއިރު އަޅުގަނޑުމެންގެ އަމާޒެއްގެ ގޮތުގައި މިހިރީ އެންމެ ފުރަތަމަ ދިވެހީންގެ ނިސްބަތް 51 އިންސައްތައިން މައްޗަށް މެޖޯރިޓީ އަށް ވާސިލުވުން" އަލީ ވިދާޅުވިއެވެ.
އެ ބަދަލާ އެކު 5،000 ދިވެހިން މި ސިނާއަތަށް އިތުރު ކުރެވޭނެ ކަމަށް އަލީ ވަހީދު ވިދާޅުވި އެވެ.
މީގެއިތުރުން ދިވެހިން މަތީ މަގާމުތަކަށް ގެނެވޭނެ އުސޫލުތަކާއި، ދިވެހިން މި ދާއިރާއަށް ތަމްރީނުކުރުމުގެ އިންޑަސްޓްރީއާއި ސަރުކާރާއި ގުޅިގެން ކުރެވޭނެ މަޝްވަރާތައް އެހެން މިނިސްޓްރީތަކާއި ގުޅިގެން ކުރެވެމުންދާ ކަމަށްވެސް މިނިސްޓަރު ވިދާޅުވިއެވެ.
