މި މީހާ ފޭސް މާސްކު އެޅީ މޫނު ރީތި ކުރަން، އެކަމަކު މޫނު ބަދަލުވީ ރީނދޫ ކުލައަށް
ހަންގަނޑު ރީތި ކުރުމަށްޓަކައި ގުދުރަތީ މާއްދާތައް އެކުލެވޭ ގޮތަށް ތައްޔާރު ކޮށްފައި ހުންނަ ފޭސް މާސްކުތަކަށް ވުރެ ރަނގަޅު އެއްޗެއް ނުހުންނަ ކަމަށް ގިނަ ބަޔަކު ގަބޫލު ކުރެއެވެ. އަދި އަމިއްލައަށް އެކި ކަހަލަ ހަންގަނޑަށް ފައިދާ ހުރި އެއްޗެހި ބޭނުން ކޮށްގެން ވެސް ފޭސް މާސްކު ބައެއް މީހުން އުފައްދައެވެ. އަދި ފޭސްކު މާސްކު އުފައްދާއިރު ރީނދޫ އެޅުމަކީ ވަރަށް އާންމުކޮށް މީހުން ކޮށްއުޅޭ ކަމެކެވެ. ނަމަވެސް ފޭސް މާސްކު އަޅާއިރު މާ ގިނައިން އެއަށް ރީނދޫ އެޅުމަކީ ބައެއް ފަހަރަށް ވަރަށް ގެއްލުން ވާ ކަމެކެވެ.
މިފަހަރު ސްކޮޓްލޭންޑްގެ އަންހެނަކަށް ވެސް ދިމާވެފައި ވެސް މިވަނީ އެފަދަ ކަމެކެވެ. ލައުރެން ނަމަކަށް ކިޔާ މިމީހާ އަކީ ޓިކްޓޮކް ވެސް ކުޅެއުޅޭ މީހެކެވެ. އެގޮތުން އޭނާ ދާދި ފަހަކުން ވަނީ އޭނާގެ މޫނުގެ ހަންގަނޑު ރީތި ކުރުމަށްޓަކައި މާސްކެއް އުފައްދާ އެކަން ޓިކްޓޮކްގައި ހިއްސާ ކޮށްފައެވެ. ލައުރެން ބުނާ ގޮތުގައި މި މާސްކަކީ ވީޑިއޯ އެއް ބަލައިގެން އޭނާ ތައްޔާރު ކުރި މާސްކެކެވެ. އަދި އެ ވީޑިއޯގައި ބުނާ ގޮތުން މި މާސްކު ބޭނުން ކުރުމުން މޫނުގައި ނަގާފައި ހުންނަ ބިހިތައް ފިލައި ގޮސް ހަންގަނޑު ރީތިވެއެވެ.
އެ ވީޑިއޯ ބެލުމަށްފަހު އެ މާސްކަކީ ފަސޭހައިން ތައްުޔާރު ކޮށްލެވޭ އެއްޗަކަށް ވާތީ، އެ މާސްކު ތައްޔާރު ކުރަން އޭނާ ނިންމީ ކަމުގައި އޭނާ ވަނީ އޭނާގެ 17000 ފޮލޯވަރުން ތިބޭ ޓިކްޓޮކް އެކައުންޓުގައި ބުނެފައެވެ. ލައުރެން ބުނި މާސްކު ތައްޔާރު ކުރުމަށް ރީނދޫ އެޅި ވަގުތު އޭނާގެ އަތުގެ ކުލަ ވެސް ރީނދޫ ކުލައަށް ބަދަލުވި ކަން އޭނާއަށް ފާހަގަވި ކަމަށެވެ. އަދި މޫނުގައި ފޭސް މާސްކު އެޅުމަށް ފަހު، މޫނުގެ ހަންގަނޑުގެ ކުލަ ވެސް މުޅިން ރީނދޫ ކުލައަށް ބަދަލުވި ކަމަށް އޭނާ ބުނެއެވެ. އަދި އޭނާ މޫނު ދޮވުމަށްފަހު ވެސް ރީނދޫ ކުލަ ފިލައިގެން ނުދާ ކަމަށް ވެސް އޭނާ ބުންޏެވެ.
އޭނާ ވަނީ މޫނު ރީނދޫ ވުމުން މޭކްއަޕް ބޭނުން ކޮށްގެން ވެސް މޫނު ރީތި ކުރަން މަސައްކަތް ކޮށްފައެވެ. ނަމަވެސް އެކަން ވަނީ ނާކާމިޔާބު ވެފައެވެ. މިކަމާ ގުޅިގެން ލައުރެންގެ ޓިކްޓޮކް ފޮލޯވަރުން ވަނީ އޭނާއަށް ވަރަށް ޖޯކު ޖަހާފައެވެ.
