ނަފުސުގެ ވަރުގަދަކަމާއި ހަރުދަނާކަން ހިސާބުކޮށްލުމަށް މުހިންމު ނުކުތާތަކެއް!
ދިރިއުޅުމުގައި ދިމާވާ އެކި ވަރުގެ އެކި މައްސަލަތަކާ ކުރިމަތިލާ ، އެކަންކަން ހައްލު ކުރުމުގެ ބާރު އެކި މީހުންގެ ހުންނަނީ އެކި ވަރަށެވެ. ބައެއް މީހުން ނުވާނެ ކަމަށް ބުނެ ވަރަށް އަވަހަށް ކަންކަމުން ރެކި ގަނެއެވެ. ނުވިކަމަށް ދޫކޮށްލާ މާޔޫސްވެ ދިރިއުޅުން މަތީން ފޫހިވެއެވެ.
މިހުރިހާ ކަމެއް ބިނާ ވަނީ އެމީހެއްގެ އަމިއްލަ ނަފުސުގެ ވަރުގަދަ ކަމުގެ މައްޗަށެވެ. އެކަން އޮތް މިންވަރެއްގެ މައްޗަށެވެ. އެހެންކަމުން ނަފުސު ވަރުގަދަކޮށް އިތުބާރު އުފެއްދުމަކީ ކާމިޔާބު ޙަޔާތަކަށް މުހިންމު އަސާސެކެވެ. އެހެންކަމުން ތިބާގެ ނަފުސުގެ ވަރުގަދަކަން އޮތް މިންވަރެއް ދެނެގަންނާށެވެ. ވަރުގަދަ ކުރުމަށް މަސައްކަތް ކުރާށެވެ.
މި ސިފަތައް ހުރި ނަމަ ތިއީ ވަރުގަދަ ނަފުސެއްގެ ވެރިއެކެވެ.
މާޒީއާ މެދު ނުވިސްނާ އަބަދުވެސް ދާނީ ކުރިއަށް
މާޒީގައި ކުރެވިފައި ހުރި ނުރަނގަޅު ކަންކަމަކީ ކުރިއަށްދާން އޮތް ހުރަހެއް ކަމަކަށް އެމީހުން ނުދެކޭނެއެވެ. ނަމަވެސް އެ ތަޖުރިބާއާއެކު އެމީހުން ދާނީ ކުރިއަށެވެ. ޖެހުނު ކަޅު ލައްގަނޑަކީ ހަޔާތަށް ޖެހޭ ފުލުސްޓޮޕެއް ނޫންކަން އެމީހުން ޔަގީން ކުރެއެވެ. ވާހަކައެއް ނަމަ އެ ވާހަކައިގެ ފެށުން ރީތި ނޫންނަމަ މީހުން އެ ވާހަކައަކާ މެދު ފޫހި ވާ ގޮތް ވެއެވެ. ނަމަވެސް ދިރިއުޅުމުގައި މުހިންމީ ރިވެތި ފެށުމެއް ނޫނެވެ. އެކަމެއްގެ ނުވަތަ ޙަޔާތުގެ ނިމުން ރީތި ކުރުމެވެ. މިއީ ވަރުގަދަ ނަފުސެއްގެ އެންމެ މުހިންމު ވިސްނުމެވެ.
ބަދަލު ގެންނަން ތައްޔާރު، ގޮންޖެހުންތަކަށް މަރުޙަބާ!
ޙަޔާތް ޙަޔާތަކަށް ވަނީ ކަންކަން ބަދަލުވުމާއި ބަދަލު ކުރުން އޮތަތީއެވެ. އެކި ގޮންޖެހުންތައް އެކުލެވޭތީއެވެ. ނަމަވެސް ހަރުދަނާ ނަފުސެއްގެ ވެރީންނަކީ މިއިން އެއްވެސް ކަމަކާ ފަސްޖެހޭ ބައެއް ނޫނެވެ. އެމީހުން ، ޙަޔާތަށް ގެންނަން ޖެހޭ ފައްސި ބަދަލެއް ނަމަ އެކަން ކުރާކަށް ފަހެއް ނުޖެހޭނެއެވެ. އަދި ނަގާ ބޮޑެތި ރާޅުތަކަށް ފިލާ ވެސް އެމީހުން ނުތިބެތެވެ. ގޮންޖެހުންތަކާ ކުރިމަތިލުމަކީ އެމީހުންނަށް ލިބޭ އުފަލެކެވެ.
އަމިއްލަ ނަފުސުގެ ކޮންޓްރޯލް ނެތް ކަންކަމަށް ހަކަތައެއް ނުއަންދާނެ
ހަޔާތުގެ ވަރަށް ގިނަ ކަންކަމަކީ އެކަންކަމުގެ މައްޗަށް އަހަރެމެންގެ ކޮންޓްރޯލް ނޯންނަ ކަންކަމެވެ. އާއިލީ ގުޅުންތަކުގައި ދިމާވާ މައްސަލަތަކާއި ރަޙުމަތްތެރިކަމުގެ ގުޅުންތަކުގައި ވެސް ތިމާއާ ނުވެސް ބެހޭ ، އަދި އެކަންކަން ހައްލު ކުރުމަށް ތިމާއަށް ކޮންޓްރޯލް ނެތް ކިތަންމެ ކަމެއް ދިމާވެއެވެ. ވަރުގަދަ ނަފުސުގެ އަހުލުވެރީންނަކީ އެކަންކަމާމެދު ބޭކާރު ހަކަތަ ނުއަންދާ ، ދިރިއުޅުމާމެދު އުފާވެރި ކަމާއެކު ކުރިއަށް ދާ މީހުންނެވެ.
އެމީހުންނަކީ އިންސާފުވެރި ، ހިތްހެޔޮ ބައެއް
ވަރުގަދަ ނަފުސެއްގެ އަހުލުވެރީންނަކީ އިންސާފަށް ލޯބިކުރާ އިންސާފުވެރި ބައެކެވެ. އެމީހުންގެ ދިރިއުޅުމުގެ ކަންކަމާއި އެހެން މީހުންނާ ކުރާ މުޢާމަލާތްތަކުގައި އިންސާފުވެރިކަން އިސްކުރެއެވެ. ބޭއިންސާފާ ދެކޮޅަށް އަޑު އުފުލާ މަސައްކަތް ކުރުމަކީ އެމީހުން ބިރު ގަންނަ ކަމެއް ނޫނެވެ. ހަމައެހެންމެ އެމީހުންގެ ދިރިއުޅުމުގެ ކޮންމެ ކަމަކަށް ބަލާލި ނަމަވެސް ފެންނާނީ ހިތްހެޔޮ ކަމެވެ.
ރިސްކު ނަގާނެ
ދިރިއުޅުމުގެ އެއްވެސް ކަމަކީ ޔަގީންކަން އޮތް ކަމެއް ނޫނެވެ. ވިޔަފާރި ފަދައިން ހަޔާތުގެ އެކި ގުޅުންތަކާއި ދިރިއުޅުމުގައި ކުރާ ކޮންމެ ކަމެއްގައި ވެސް ރިސްކު އެކުލެވެއެވެ. އެހެންކަމުން ހަރުދަނާ ނަފުސުގެ ވެރީންނަކީ އެކަމާ ހެދި ފަހަތަށް ޖެހޭ ބައެއް ނޫނެވެ. އޭގެ ދެކޮޅު ބަލައި އެމީހުން ކަން ނިންމާނީ ރިސްކު އޮތްކަން ދެނެގަނެގެންނެވެ.
އެހެން މީހުންގެ ކާމިޔާބީގައި ވެސް އަތްޖަހާނެ
ތިމާގެ ނަފުސަށް އެދޭ ފަދައިން އެހެން މީހުންގެ ނަފުސަށް އެދުމަކީ މުސްލިމުންގެ ސިފައެއް ނަމަވެސް އަހަރެމެންގެ ވަރަށް ގިނަ މީހުންނަކީ އަހަރެމެން އެދޭ ކަމެއް ހާސިލް ނުވެ ، އެހެން މީހަކަށް އެކަމެއް ހާސިލް ވެއްޖެނަމަ އެކަމާ އުފާކުރަން ނުކެރޭ މީހުންނެވެ. އެއަށް ވުރެ އަވަހަށް އެމީހުންގެ ހިތުގައި ރޯވަނީ ހަސަދައިގެ އަލިފާން ގަނޑެކެވެ. ނަމަވެސް ހަރުދަނާ ނަފުސުގެ އަހުލުވެރީންނަކީ އެހެން މީހުންގެ ކާމިޔާބީގައި ވެސް އުފާކޮށް އަތްޖަހަން ކެރޭ ވަރުގަދަ ބައެކެވެ.
