ޝަހީމްގެ ތައުރީފް އަދުރޭ އަށް: ތިއީ ޕީޕީއެމްގެ ދިދަ ވެއްޓުނު ނުދީ ހިފެހެއްޓެވި ވަރުގަދަ ބޭފުޅެއް!
ޕީޕީއެމް އިދިކޮޅު ޕާޓީއެއްގެ ގޮތުގައި ކުރިއަށް ނެރެ ސަރުކާރު ޖަވާބުދާރީ ކުރުވުމުގައި މިވަގުތު އިދިކޮޅުގައި ހުރި އެންމެ އިސް ލީޑަރު އަބްދުއްރަހީމް އަބްދުﷲ ކުރައްވަމުން ގެންދަވާ މަސައްކަތަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ތައުރީފް ކުރައްވައިފިއެވެ.
ފޭސްބުކްގައި ކުރެއްވި ޕޯސްޓެއްގައި ޝަހީމް ވިދާޅުވީ އިސްލާމް ދީނާއި ދިވެހި ގައުމު ދެކެ ލޯބިވާ ތައުލީމީ އެންމެން ވެސް ތިބެންވީ އެއް ސަފެއްގައި ކަމަށެވެ. އަދި ސަފުތައް އަލުން ތަރުތީބު ކުރެއްވުމަށް ޕީޕީއެމް/ޕީއެންސީގެ ލީޑަރު އަދުރޭ، ރައީސް އަބްދުﷲ ޔާމީންގެ ލަފާފުޅާއެކު ކުރައްވަމުން ގެންދަވާ ހިކުމަތްތެރި މަސައްކަތްޕުޅުތަކުގައި ބަރަކާތް ލެއްވުން އެދި ދުއާ ކުރާ ކަމަށް ޝަހީމް ވިދާޅުވިއެވެ
"ހަގީގަތުގައި ވެސް އަޅުގަނޑު ދަންނަވާނީ އަދުރޭ އަކީ ސިޔާސީ ގޮތުން ވަރަށް ތަޖުރިބާ ހުރި އަދި މިވަގުތު ޕީޕީއެމްގެ ދިދަ ވެއްޓުނު ނުދީ ހިފެހެއްޓެވި ވަރުގަދަ ބޭފުޅެކޭ." ޝަހީމް ވިދާޅުވިއެވެ.
ޝަހީމް އިތުރަށް ވިދާޅުވީ ތޫފާނެއްގައި ޖެހި ސަފުތައް ރޫޅިގެން ދިޔަޔަސް ހިކުމަތްތެރި ލީޑަރެއްގެ ތަސައްވުރެއް އޮތް ނަމަ އަލުން ސަފުތައް ތަރުތީބުކޮށް ނަސްރު ހޯދާނެ ކަމަށެވެ. ރައީސް ޔާމީން އަކީ އެފަދަ ހިތްވަރުގަދަ ވިސްނުންތެރި ތަފާތު ޝަހްސިއްޔަތެއް ކަމަށާއި މާތްﷲ އެމަނިކުފާނަށް ނަސްރާއި ނަސީބު މިންވަރު ކުރައްވާތޯ ދުއާ ކުރާ ކަމަށް ޝަހީމް ވިދާޅުވިއެވެ.
Ads by STO
