ޖަމީލް ޕީޕީއެމްއާ ގުޅިވަޑައިގަތީ ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ މެންބަރެއްގެ ގޮތުގައި ހުންނެވުމަށްފަހު އެވެ.
2013 ވަނަ އަހަރު ޕީޕީއެމްގެ ޓިކެޓުގައި ވާދަކުރައްވައި ރައީސް އަބްދުﷲ ޔާމީން ރިޔާސީ އިންތިހާބު ކާމިޔާބު ކުރެއްވިއިރު އެމަނިކުފާނުގެ ނައިބު ރައީސެއްގެ ގޮތުގައި ހުންނެވީ ޖަމީލުއެވެ. ނަމަވެސް 2015 ވަނަ އަހަރު ރައްޔިތުންގެ މަޖިލީހުން ވަނީ ޖަމީލުގެ އިތުބާރު ނެތްކަމުގެ ވޯޓު ނަގައި އޭނާ މަގާމުން ދުރުކޮށްފައެވެ.
އޭގެފަހުން ޖަމީލުގެ ދިރިއުޅުއްވުން ރާއްޖެއިން ބޭރަށް ބަދަލުކުރެއްވިއިރު، ޖަމީލު ދެން ގުޅިވަޑައިގެންނެވީ އޭރުގެ އިދިކޮޅު ފަރާތްތަކާއެވެ. އެގޮތުން އޭރުގެ އިދިކޮޅު ފަރާތްތަކުން އުފެއްދެވި އިއްތިހާދުގެ ލީޑަރުކަން ވެސް ޖަމީލު ކުރެއްވިއެވެ.
ޔާމީންގެ ސަރުކާރަށް ބޮޑެތި ފާޑުކިޔުންތަކެއް ޖަމީލު އަމާޒު ކުރެއްވިއިރު، ރިޔާސީ އިންތިހާބަށްފަހު ރާއްޖެ ވަޑައިގެން ޖަމީލު ދެން ފެނިވަޑައިގެންނެވީ ޖުމްހޫރީ ޕާޓީންނެވެ. ނަމަވެސް މިދިޔަ ރައްޔިތުންގެ މަޖިލީހުގެ އިންތިހާބުން ލިބުނު ނާކާމިޔާބީއާއެކު ޖަމީލު ވަނީ ޖޭޕީއާ ވެސް ދުރަށް ޖެހިވަޑައިގެން މި ސަރުކާރަށް ފާޑު ވިދާޅުވާން ފައްޓަވާފައެވެ.
އަދި މިހާރުގެ އިދިކޮޅު ފަރާތްތަކާއެކު ޖަމީލު މަސައްކަތް ކުރައްވަން ފެއްޓެވިއިރު، ކުރީގެ ރައީސް ޔާމީންގެ ގާނޫނީ ވަކީލުންގެ ޓީމުގައި ވެސް އެންމެ އިސްކޮށް ހުންނަވަނީ ޖަމީލުއެވެ.
