ރައީސް ސޯލިހު އެމްޑީޕީއަށް އަހަރީ ދުވަހުގެ ތަހުނިޔާ ފޮނުއްވައިފި
ރާއްޖޭގައި މިވަގުތު އޮތް އެންމެ ބޮޑު ސިޔާސީ ޕާޓީ، އެމްޑީޕީގެ އަހަރީ ދުވަހުގެ ތަހުނިޔާ އެ ޕާޓީގެ އެންމެހާ މެމްބަރުންނަށް، ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު ފޮނުއްވައިފި އެވެ.
މިއަދަކީ އެމްޑީޕީ އުފެދުނުތާ 15 އަހަރު ފުރުނު ދުވަހެވެ. ސިޔާސީ ޕާޓީ އުފެއްދުމުގެ ހުއްދަ 2005 ވަނަ އަހަރު ލިބުމާއި އެކު އެންމެ ފުރަތަމަ ރެޖިސްޓްރީ ކުރި ޕާޓީއަކީ އެމްޑީޕީއެވެ.
މި މުނާސްބަތުގައި ރައީސް ސޯލިހު ކުރެއްވި ޓްވީޓެއްގައި ވަނީ އެ ޕާޓީގެ އެންމެހާ މެންބަރުންނަށް އަހަރީ ދުވަހުގެ ހެޔޮއެދުމާއި ތަހުނިޔާ އަރިސް ކުރައްވާފަ އެވެ.
އެމްޑީޕީގެ 15 ވަނަ އަހަރީ ދުވަހުގެ ހެޔޮއެދުމާއި ތަހުނިޔާ ޕާޓީގެ ހުރިހާ މެމްބަރުންނަށް އަރިސްކުރަން.
— Ibrahim Mohamed Solih (@ibusolih) June 26, 2020
އެމްޑީޕީގެ އަހަރީ ދުވަހުގެ ތަހުނިޔާ ފޮނުއްވަމުން އެ ޕާޓީގެ ރައީސް މުހައްމަދު ނަޝީދު ވިދާޅުވީ އެމްޑީޕީގެ 15 އަހަރުގެ ހަޔާތުގައި ދެ ފަހަރަށް ރާއްޖޭގެ ވެރިކަން ކުރެވިފައިވާ ކަމަށާއި ހުރިހާ ސިޔާސީ ވާދަވެރިން ރޫޅިފައިވާ ކަމަށާއި އަދިވެސް ކަންކަން ކުރެވޭނީ އެމްޑީޕީ އަށް ކަމަށެވެ.
އެމްޑީޕީގެ އަހަރީ ދުވަހުގެ ތަހުނިޔާ ސަރުކާރު ކޯލިޝަންގެ ހިމެނޭ އެހެން ޕާޓީތަކުގެ އިސް ބޭފުޅުންނާއި ވަޒީރުން ވެސް ގެންދަވަނީ ފޮނުއްވަމުންނެވެ.
