މަސްވެރިންނަށް އަވަހަށް ވެކްސިން ޖެހޭ ގޮތް ހެދުން ވަރަށް މުހިންމު: ބީކޭއެމްޔޫ
މަސްވެރިންނަށް ވީހާވެސް އަވަހަށް ކޮވިޑް ވެކްސިން ޖެހުން ވަރަށް މުހިންމު ކަމަށް ބޮޑުކަންނެލި މަސްވެރިންގެ ޔޫނިއަނުން ބުނެފިއެވެ.
ބޮޑުކަންނެލި މަސްވެރިންގެ ޔޫނިއަނުން ބުނީ މަސްވެރިން އަމަލު ކުރަމުން ދަނީ އެޗްޕީއޭއިން ކަނޑައަޅާފައިވާ މިންގަނޑާ އެއްގޮތްވާ ގޮތުގެ މަތިން ކަމަށާއި، މަސް ކިރުމަށް މާލޭގެ ފަޅުގައި ދޯނި އެޅުމަށް ފަހުގައި ކިތަންމެ މުހިންމު ކަމަކަށް ވިޔަސް ދޯނިން ނުފައިބާ ކަމަށެވެ. އަދި އެންމެ ފުރަތަމަ ކޮވިޑްގެ ބިޔަ ރާޅު ރާއްޖެއަށް ޖަހައި ރާއްޖޭގެ އިޤްތިޞާދު ވެއްޓިފައި ވަނިކޮށް، އެ ނުރައްކާތެރި ދަނޑިވަޅުގައި ވެސް މަސްވެރިން ނިކުމެ މަސައްކަތްކޮށް ގައުމުގެ އިޤްތިޞާދު ކޮޅަށް ޖެހީ ދިވެހި މަސްވެރިން ކަމުގައި ވެސް ބޮޑު ކަންނެލި މަސްވެރިންގެ ޔޫނިއަނުން ވަނީ ފާހަގަކޮށްފައެވެ.
މަސްވެރިން އޭރުވެސް ހިތްވަރު ކުރި ފަދައިން މިއަދު ވެސް އެދަނީ ހިތްވަރު ކުރަމުން ކަމަށާއި އެހެންކަމުން މަސްވެރިންނަށް ކޮވިޑް ވެކްސިން ޖެހުމުގައި އަވަސް ކުރުމަކީ މުހިންމުކަމެއް ކަމަށް ބޮޑު ކަންނެލި މަސްވެރިންގެ ޔޫނިއަންއިން ފާހަގަ ކުރައްވާފައެވެ.
އަދި ކޮވިޑުގެ މި ނުރައްކާތެރި ދަނޑިވަޅުގައި މަސްވެރިން ދައްކަމުން އަންނަ ހިތްވަރަށް ރައީސުލް ޖުމްހޫރިއްޔާ ވެސް ވަނީ ޝުކުރު އަދާ ކުރައްވާފައެވެ. އަދި މަސްވެރިންގެ މުހިންމުކަން އެމަނިކުފާނު ވަނީ އެތައް ޕޯޑިއަމެއްގައި ވެސް ފާހަގަ ކުރައްވާފައެވެ. އެގޮތުން ކޮވިޑުގެ މިހާލަތުގައި ޤައުމުގެ "ވިންދު" ޖަހަޖަހާ އޮތީ ހަމައެކަނި މަސްވެރިންގެ މަސައްކަތުން ކަމުގައި ވެސް މިއަހަރުގެ ރިޔާސީ ބަޔާނުގައި އެމަނިކުފާނު ވަނީ ފާހަގަ ކުރައްވާފައެވެ.
