އިއުލާނުކުރި ފްލެޓް ލިސްޓުގައި މައްސަލަ ހުރިނަމަ ހައްލު ހޯދައިދޭނަން: ރައީސް ޞާލިޙް
އިއުލާނު ކުރި ހިޔާ ފްލެޓް ލިބޭ މީހުންގެ ލިސްޓުގައި އެއްވެސް މައްސަލައެއް އުޅޭނަމަ އެކަމަށް ހައްލު ހޯދައިދެއްވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ސަރުކާރު ހިންގާ އެމްޑީޕީގެ ޤައުމީ މަޖިލީހުގެ ބައްދަލުވުމެއްގައި މީގެ އިރުކޮޅެއް ކުރިން ވާހަކަފުޅު ދައްކަވަމުން ރައީސް ޞާލިހް ވިދާޅުވީ ފްލެޓްތައް އެންމެ ޙައްޤުވާ ފަރާތްތަކަށް ނުލިބި އޮތުމަކީ އެކަށީގެންވާ ކަމެއް ކަމަށެވެ.
"މިިދިޔަ ސަރުކާރުން ފަށާފައި އޮތް މަސައްކަތެއް 7000 ފްލެޓްގެ މަސައްކަތަކީ. އެ މަސައްކަތް ނިމުމުން ފްލެޓް ހަވާލުކުރުމުގެ މަސައްކަތް އަޅުގަނޑުމެން ވާނީ ކޮށްފައި. އަޅުގަނޑަށް އެނގޭ ރައްޔިތުންގެ ވަރަށް ގިނަ ކަންބޮޑުވުން އެބަހުރިކަން. 7000 ފްލެޓަށް 25،000 މީހުން ކުރިމަތިލާ އިރު ޝަކުވާ ހުންނާނެ. އިއުލާން ކުރި ފްލެޓްގައި މައްސަލަ ހުރި ނަމަ އެކަން ބަލާ ހައްލު ހޯދައި ދޭނަން" ރައީސް ޞާލިޙް ވިދާޅުވިއެވެ.
ރައީސް ސާލިހް މިފަދައިން ވިދާޅުވެފައި މިވަނީ ފްލެޓް ލިބޭ މީހުންގެ ލިސްޓް މި ސަރުކާރުން އިއުލާން ކުރި ލިސްޓުން ވަރަށް ނިކަމެތި ހާލުގައި ދިރިއުޅޭ މީހުންނަށް ކަޓުވާލައި އެކަމުގެ ޝަކުވާތައް ބޮޑުވެފައިވާ ދަނޑިވަޅެއްގައެވެ. އަދި ސިޔާސީ ބައެއް ބޭފުޅުންނާއި އެބޭފުޅުންގެ އާއިލާގެ ބޭފުޅުންނަށް ފްލެޓް ލިބުމާ ގުޅިގެން މީސްމީޑިއާގައި އެކި މީހުންގެ ކަންބޮޑުވުންތައް ވެސް އާންމުވެފައިވާ ހިނދެއްގައެވެ. އެގޮތުން ރައީސް ސާލިޙްގެ ކޮއްކޯފުޅު އައިޝަތު އިބްރާހީމް ސާލިހާއި ޝައިޚް އަލީ ޒައިދާއި އެމަނިކުފާނުގެ އަނބިކަނބަލުންގެ އިތުރުން ރައީސް ޔާމީނަށް ހުކުމް އިއްވެވި ފަނޑިޔާރު އަލީ ރަޝީދާއި އެމަނިކުފާނުގެ އާއިލީ ބޭފުޅުން ވެސް ފްލެޓް ހައްގުވެރީންގެ ލިސްޓްގައި މިހާރު ހިމެނެއެވެ.
ކޮބައިތަ ޓީޗަރުންގެ ފުލެޓްތައް މިސަރުކާޜުވެަސް ލިސްޓްގަ އޮތްމީހުން ފުލެޓް ދިންއިރު އެމީހުންނަް ނުލިބި ކޮބައިތޯ އިންސާފު ބައްލަވާ ދެއްވާ