އިންފެކްޓް ނުވާނޭހެން މޭކަޕްސާމާނު ބަލަހައްޓާނީ ކިހިނެއް؟

މޭކަޕަކީ މޫނުގެ އެކި ގުނަވަންތަކާއި ހަންގަނޑުގައި ބޭނުންކުރާ އެއްޗިއްސަށް ވުމަށް، އިންފެކްޝަން އިން ރައްކާތެރިވުމަށް އެތަކެތި ސާފުތާހިރުކޮށް ބެލެހެއްޓުމަކީ ވަރަށް މުހިންމު ކަމެކެވެ. މޫނުގައި ބޭނުންކުރާ މޭކަޕްތައް ގަވައިދުން ކޮންމެ ދުވަހަކު ސާފު ކުރުމަށް ވަރަށް ބޮޑަށް ސަމާލުކަން ދޭން ޖެހޭނެއެވެ. މޭކަޕް ކުރަން ބޭނުންކުރާ ސާމާނު ތަކުގައި ޖަރާސީމް އުފެދިއްޖެނަމަ، ހަންގަނޑަށް ސިއްހީ ބައެއް މައްސަލަތައް ދިމާވުމަކީ އެކަށީގެންވާ ކަމެކެވެ. މޭކަޕްގެ އެކި ސާމާނުތައް ސާފު ކުރަން ޖެހޭނީ އެކި ގޮތްގޮތަށެވެ.

ތުންފަތުގައި ކުލަ ޖެއްސުމަށް ގިނަ އަންހެން ކުދިން ލިޕްސްޓިކް ގެންގުޅޭނެއެވެ. މޭކަޕްގެ ބާވަތްތަކުގެ ތެރެއިން ލިޕްސްޓިކެއް ނުގެންގުޅޭ ކުއްޖަކު މަދުވާނެއެވެ. އެގޮތުން، ތުންފަތުގައި ކުލަޖެއްސުމަށް ބޭނުންކުރާ ލިޕްސްޓިކް ރައްކާތެރިކަމާއެކު ގެންގުޅެން ބޭނުންނަމަ، އެހެން މީހުންނަށް އެ ލިޕް ސްޓިކް ހާކަން ނުދޭށެވެ. ތިމާ ކުލަ ޖައްސަން ބޭނުންކުރާ ލިޕް ސްޓިކް އެހެން މީހުންގެ ތުންފަތުގައި ހާކަން ދިނުމުން، އެ ބޭނުންކުރާ މީހާގެ ތުންފަތުގައި ހުންނަ ހުރިހާ ޖަރާސީމު ތަކެއްވެސް އެ ލިޕްސްޓިކްގައި ހޭކޭނެއެވެ. މީގެ އިތުރުން، ތުންފަތުގައި ކުލަ ޖެއްސުމަށްފަހު ގެންގުޅޭ ލިޕްސްޓިކްގެ މަތި ސާފު ޓިޝޫ ކޮޅަކުން ފޮހެލުމުން ވެސް އިންފެކްޓް ވުމުން ދުރުވާނެއެވެ.

ލޮލުގައި އަނދުން އެޅުމަށް ގެންގުޅޭ އަނދުން ފަންސޫރު އަދި ތުންފަތުގައި ކުލަ ޖެއްސުމަށް ކްރެޔޯން ގެންގުޅޭ ނަމަ ކޮންމެ ދުވަހަކުވެސް އެ ތަކެތި ބޭނުން ކުރުމުގެ ކުރިން، ދީފައި އޮންނަ ހާއްސަ ދަތިން ޖަހާލާށެވެ. މީގެ ސަބަބުން ކުރީގެ ފަށަލަ ގޮސް އާފަށަލައެއް އަންނާނެއެވެ. މިހެން ހެދުމުން ލިޕް ކްރެޔޯން އަދި އަނދުން ފަންސޫރުގައި ކޮންމެ ދުވަހަކު ހަރުލާފައި ހުންނަ ޖަރާސީމުތައް ސާފު ވާނެއެވެ.

މޫނުގައި ފުށް ޖެހުމަށް އަދި ބްލަޝަރ ނުވަތަ ފައުންޑޭޝަން ހޭކުމަށް ގެންގުޅޭ ބްރަޝް އަދި ސްޕޮންޖް ފަދަ ތަކެތި، ޖަރާސީމުން ރައްކާތެރިކޮށްގެން ގެންގުޅުމަކީ ވަރަށް މުހިންމު ކަމެކެވެ. އެގޮތުން، މިތަކެތި ސާފު ކޮށް ބެހެެއްޓުމަށް ހަފްތާއަކު އެއްފަހަރު ބްރަޝް އަދި ސްޕޮންޖް ފެނުން ދޮވެ ސާފު ކުރެވިދާނެއެވެ. އަދި ފެނުން ދޮވެފައި، އަތުގައި އުނގުޅުމަށް ބޭނުންކުރާ ސެނެޓައިޒަރ ވެސް ހޭކިދާނެއެވެ. އޭގެ ފަހުން ސާފު ޓިޝޫ އަކުން ރީތިކޮށް އެތަކެތި ހިއްކާނީއެވެ.

ލޮލުގެ އެސްފިޔަތައް ދިގު އަދި ކަޅުކުރަން ބޭނުންކުރާ މަސްކަރާ އަކީ ވަރަށް ފަސޭހައިން ޖަރާސީމު އުފެދޭ އެއްޗެކެވެ. އެހެން ކަމުން ކޮންމެ ތިން މަހަކު މަސްކަރާފުޅި އައު ކުރުމަކީ ވަރަށް ބުއްދިވެރި ކަމެކެވެ.