ވަގުތު ފާއިތުވުމުގެ ކުރިން މީހުންގެ އަގުވަޒަން ކުރަން ދަންނާށެވެ.
ދިރިއުޅުމުގައި އަހަރެމެންނަށް ބައެއް ކަންކަން ވިސްނެނީ ވަގުތު ފާއިތުވާ ފަހުންނެވެ. އެކަންކަން ވިސްނޭއިރު ކުރެވޭ މާ ބޮޑު ކަމެއް ނޯންނައިރު އެކަމަކާ މުޅި އުމުރަށް ހިތާމަ ކުރަން ޖެހޭ ފަހަރު ވެސް އާދެއެވެ. ތިބާ މީހަކާއެކު ހޭދަ ކުރާ ވަގުތުގެ އަގު ވަޒަން ކުރަން ތިބާ ދަންނަން ޖެހެއެވެ. އެތައް ސަބަބުތަކަކަށް ޓަކައެވެ.
މާދަމާ ތިބާގެ ގާތުގައި އޭނާ ނުހުރެދާނެއެވެ. ތިބާއަށް އޭނާ ނުގުޅަފާނެއެވެ. ތިބާއަށް މެސެޖު ނުކޮށްފާނެއެވެ. ތިބާގެ ލޯ ކުރިމަތީގައި ފެންނަން ނުހުރެދާނެއެވެ. މުޅި އުމުރަށް ތިބާއާ، އަދި މުޅި ދުނިޔެއާ ވެސް އަލްވަދާއު ކިޔާފާނެއެވެ. އެ ދުވަހަކުން ތިބާއަށް އެމީހެއްގެ މުހިންމުކަން ވިސްނޭނެއެވެ. އޭނާގެ އަގު ވަޒަން ކުރެވޭނެއެވެ.
ދިރިއުޅުމުގައި ބައެއް ފަހަރަށް ތިބާއަށް،، ތިބާ ދެކެ ލޯބިވާ މީހުން ގެއްލެނީ ވެސް ތިބާގެ އިހުލާމުންނެވެ. އެމީހަކު ތިބާއާ ވާހަކަ ދައްކަން މަސައްކަތް ކުރިޔަސް ތިބާ އޭނާއާ ވާހަކަ ނުދެއްކީއެވެ. ތިބާއަށް އޭނާގެ މުހިންމުކަން ވިސްނެނީ އޭނާ ތިބާ ދޫކޮށް ދާ ފަހުންނެވެ. އެހެން ނަމަވެސް އޭރުން އޮންނަނީ ވަގުތު ފާއިތު ވެފައެވެ. ދެވަނަ ފަހަރަށް ގޮސް އާދޭސް ކުރި ނަމަވެސް އޭނާ ތިބާއާ ދިމާއަށް އެނބުރި ބަލާލުމަކީ ނާދިރު ކަމެކެވެ.
އެކުވެރިޔާއެވެ. ދިރިއުޅުމުގައި މީހެއްގެ މުހިންމުކަން އެނގެންވީ އެމީހަކު ތިބާއާ ވަކިވެގެން ދިއުމަކުން ނޫނެވެ. އެމީހަކު ތިބާއާ އެކުގައި ހުއްޓައެވެ.
Ads by STO
