އަޝްފާގު ވެކްސިން ޖަހައިފި
ރާއްޖޭގައި އުފެދުނު އެންމެ ކާމިޔާބު ފުޓުބޯޅަ ކުޅުންތެރިޔާ އަލީ އަޝްފާގް (ދަގަނޑޭ) ކޮވިޑް ވެކްސިން ޖަހައިފިއެވެ.
އަޝްފާގު ވަނީ ވެކްސިން ޖެހި މަންޒަރާއެކު މިއަދު ޓްވީޓް ކޮށްފައެވެ. ހަމަ އެހެންމެ ގިނަ ބަޔަކު ދަނީ އެ ޓްވީޓް، ރިޓްވީޓު ކުރަމުންނެވެ.
އަޝްފާގު މިއަދު ވެކްސިން ޖަހާފައިވާއިރު ކްލަބްތަކުގެ ކުޅުންތެރިންނާއި ޓެކްނިކަލް ސްޓާފުން ވަނީ މިއަދު ވެކްސިން ޖަހަން ފަށާފައެވެ.
އެފްއޭއެމްގެ ރައީސް ބައްސާމް އަދީލް ޖަލީލް މިއަދު ކުރެއްވި ޓްވީޓެއްގައި ވިދާޅުވީ ލީގު ފަށަން ކުރާ މަސައްކަތުގެ ތެރެއިން ކްލަބްތަކުގެ ކުޅުންތެރިންނާއި ޓެކްނިކަލް ސްޓާފުން މިއަދު ވެކްސިން ޖަހަން ފަށާނެ ކަމަށެވެ.
ބަައްސާމް ވަނީ ސްޕޯޓްސް މިނިސްޓަރު އަހުމަދު މަހުލޫފާއި ހެލްތު މިނިސްޓަރު އަހުމަދު ނަސީމް އަށް ޝުކުރު އަދާކުރައްވާފައެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ޑޭޓާއަށް ބަލާއިރު 5،485 މީހުންނަށް އިއްޔެ ކޮވިޑް ވެކްސިން ދީފައި ވެއެވެ. އަދި މިހާތަނަށް މުޅި ރާއްޖެއިން ޖުމްލަ 38،591 މީހުންނަށް ވެކްސިން ދީފައި ވެއެވެ.
މާލެ ސަރަޙައްދުގައި ވެކްސިން ދިނުމަށް ގާއިމް ކޮށްފައިވާ 6 ސެންޓަރުން މިހާތަނަށް ޖުމްލަ 31،322 މީހުންނަށް ވެކްސިން ދީފައިވާއިރު އަތޮޅުތެރޭގެ ދެ ސެންޓަރުން މިހާތަނަށް ޖުމްލަ 7،170 މީހަކަށް ވެކްސިން ދީފައި ވެއެވެ. އަދި ރިސޯޓުތަކުން 99 މީހަކަށް ވެކްސިން ދީފައިވެއެވެ.
