ފްލެޓް މައްސަލައިގައި އެންމެ ފަހު މީހާއަށް ޙައްޤު ކަށަވަރު ވަންދެން މަސައްކަތް ކުރާނަން: މުއިއްޒު
ހިޔާ މަޝްރޫއުގެ ދަށުން ރައީސް ޔާމީންގެ ސަރުކާރުން އެޅުއްވި ފްލެޓުތައް ލިބޭ މީހުން ކަނޑައަޅައި ލިޔުން ދީފައި ވަނިކޮށް އެމީހުންގެ އަތުން ފްލެޓު އަތުލުމަކީ ވަރަށް ބޮޑު އަނިޔާއެއް ކަމަށާއި، މިމައްސަލައިގައި ފްލެޓު ގެއްލުނު އެންމެހާ ފަރާތްތަކަށް ވެސް ހައްޤު ކަށަވަރު ވަންދެން މަސައްކަތް ކުރައްވާނެކަމުގައި ޕީޕީއެމްގެ ނައިބުރައީސް އަދި އެ ޕާޓީގެ ފަރާތުން މާލެ ސިޓީ ކައުންސިލުގެ މޭޔަރުކަމަށް ވާދަ ކުރައްވާ ކުރީގެ ހައުސިން މިނިސްޓަރު ޑރ.މުޙައްމަދު މުޢިއްޒު ވިދާޅުވެއްޖެއެވެ.
އަވަސް އިން ގެނެސްދިން ޕްރޮގުރާމެއްގައި ވާހަކަފުޅު ދައްކަވަމުން މުއިއްޒު ވިދާޅުވީ، ފްލެޓު ލިބޭނެކަމަށް ލިޔުން ލިބުނު މީހުންނާއި، ފްލެޓަށް އެދި ފޯމު ހުށަހެޅި ހުރިހާ ރައްޔިތުންނަކީ ވެސް ފްލެޓު ހައްގު ފަރާތްތައް ކަމަށެވެ. އެފަރާތްތަކަކީ މާލޭގައި ވަރަށް ދަތި ހާލުގައި އުޅެމުން އަންނަ ފަރާތްތައް ކަމަށާއި، އެފަރާތްތަކުގެ އަތުން ފްލެޓު އަތުލުމަކީ އަދުގެ ސަރުކާރުން އެފަރާތްތަކަށް ދިން ވަރަށް ބޮޑު އަނިޔާއެއް ކަމުގައި މުއިއްޒު ފާހަގަ ކުރެއްވިއެވެ.
"އިރާދަކުރެއްވިއްޔާ ފްލެޓް ހައްގު ނިގުޅައިގެން އެންމެ ފަހު މީހާއަށް އިންސާފު ލިބެންދެން އަޅުގަނޑު މި މަސައްކަތުގައި ދެމި ހުންނާނަން،"
މުއިއްޒު
މުއިއްޒު ވިދާޅުވީ މި ސަރުކާރުން ފްލެޓް ދެއްވި މީހުންނަށް ވެސް ފްލެޓް ޙައްޤު ކަމަށާއި ނަމަވެސް އެންމެ އިންސާފުވެރި ގޮތަކީ ކުރީ ސަރުކާރުން ނިންމެވި ލިސްޓަށް ހިޔާ މަޝްރޫޢުގެ ފްލެޓްތައް ދެއްވުން ކަމަށާއި އަދި އިތުރަށް ފްލެޓް އަޅާނެ ވަގުތު ވެސް މި ސަރުކާރަށް ލިބި ވަޑައިގެންފި ކަމަށެވެ.
އެމަނިކުފާނު ވިދާޅުވީ ސަރުކާރުތައް ބަދަލުވެ ދިޔަ ނަމަވެސް ކުރީގެ ސަރުކާރުން ނިންމާފައިވާ ނިންމުންތަކަށް އިޙްތިރާމް ކުރަން ވާނެ ކަމަށެވެ. އެގޮތުން ރައީސް ނަޝީދުގެ ވެރިކަމުގައި އަޅުއްވަން ފެއްޓެވި 1000 ފްލެޓާއި ދޫ ކުރަން ނިންމެވި 200 ގޯއްޗާއި މެދު ރައީސް ވަޙީދުގެ ވެރިކަމުގައި ކަންތައް ކުރެއްވި ގޮތް ފާހަގަ ކުރައްވަމުން މުއިއްޒު ވިދާޅުވީ އެ ލިސްޓްތަކަށް ރައީސް ވަޙީދުގެ ސަރުކާރުން ބަދަލު ނުގެންނަވާ ކަމަށެވެ.
މުއިއްޒު އިތުރަށް ވިދާޅުވީ، ފްލެޓު އަތުލާފައިވާ ފަރާތްތަކުގެ ދިފާއުގައި ވަކާލާތުކުރުމުގެ ސަބަބުން ވާދަވެރިންގެ ބަހުގެ ހޫނު ހަމަލާތައް އެބޭފުޅާއަށް އަމާޒުވެގެން އަންނަ ކަމަށެވެ. އެހެން ނަމަވެސް އެއްވެސް ފަސް ޖެހުމެއް ނެތި ހައްގު ގެއްލިފައިވާ އެންމެހާ ފަރާތްތަކަށް އެ ހައްގު ހޯދައި ދެއްވުމަށް މަސައްކަތް ކުރައްވާނެ ކަމަށާއި، އެފަދަ އާއިލާތަކުގެ ހައްގުގައި ވަކާލާތު ކުރަމުން ގެންދާނެ ކަމުގައި ވެެސް މުއިއްޒު ފާހަގަ ވިދާޅުވިއެވެ.
Ads by STO
