ފުރާނަ އަތްމައްޗަށް ލައިގެން، ވެކްސިން ޑޯޒްތަކެއް އަލިފާނުން ސަލާމަތް ކުރި ޑޮކްޓަރަކަށް ތަޢުރީފް އޮހެނީ
ދުނިޔޭގައި އެންމެ އަގު ހުރި އެއްޗެހީގެ ލިސްޓްގެ ކުރީ ސަފުން ކޮވިޑް-19 ވެކްސިން ޖާގަ ހޯދާނެކަން ޔަޤީނެވެ. ވެކްސިން ޖެހޭނެ ދުވަހެއްގެ އިންތިޒާރުގައި ގިނަ ބަޔަކު ތިބިއިރު، މިހާރު އުފައްދާފައިވާ ވެކްސިން ރައްކާތެރިކަމާއެކު ގުދަން ކޮށްފައި ބެހެއްޓުމަށް އެތަކެއް މަސައްކަތެއް ދަނީ ކުރަމުންނެވެ.
މިގޮތުން މިފަހަރު އިނގިރޭސިވިލާތުގައި ޑަކްޓަރެއް މިވަނީ ފުރާނަ އަތްމައްޗަށް ލައިގެން، ވެކްސިން ޑޯޒްތަކެއް އަލިފާނުން ސަލާމަތް ކޮށްފައެވެ.
އިނގިރޭސިވިލާތުގެ ސުރޭގައި މިދިޔަ ހޮނިހިރު ދުވަހު ވެކްސިން ޖަހާ މަރުކަޒެއްގައި އަލިފާނުގެ ހާދިސާއެއް ހިނގިއިރު މިހާދިސާގައި މަރުކަޒަށް އެކި ވަރުގެ ގެއްލުން ލިބި ފާހަގަ ކޮށްލެވޭ ކަމެއް ވަނީ ހިނގާފައެވެ. އެއީ އަލިފާންގަނޑު ރޯވެފައި ވަނިކޮށް، ވެކްސިން ރައްކާކޮށްފައި ހުރި ގުދަނަށް ވަދެ، ވެކްސިންތައް ހިފައިގަތް ނުކުތް ޑަކްޓަރެއްގެ ވާހަކައެވެ.
" ފަޔަރ އެލާމް އަޅަން ފެށީމަ އަހަރުމެން އެންމެން އަވަހަށް ނުކުތީ. އޭރު ވަރަށް ދުން ބޯވެފައި އޮތީ. ނުކުތުމަށްފަހު އަހަރެއް ދުށިން ވެކްސިން މަރުކަޒާ ހަވާލުވެގެން ހުރި ޑަކްޓަރު ދުވެފައި އަލިފާންގަނޑު ތެރެއަށް ވަތް މަންޒަރު. އޭރު ވަރަށް ކުޑަކޮށް އަލިފާން ރޯވެފައި ހުރީ ." މަންޒަރު ދުށް މީހަކު ފޮކްސް ނިއުސްއަށް މަޢުލޫމާތު ދެމުން ބުނެފައި ވެއެވެ.
އެމީހާ އިތުރަށް ބުނެފައި ވަނީ، އަލިފާންގަނޑު ބޮޑު ނުވަނީސް ފަޔަރ ރެސްކިއުން އައިސް ނިއްވާލި ކަމަށާއި ނަމަވެސް ޑަކްޓަރު ފުރާނަ އަތްމައްޗަށް ލައިގެން އެތަނަށް ވަދެ ވެކްސިންތައް ސަލާމަތް ނުކުރިނަމަ އެ ޓައުންގެ ވެކްސިން ޕްރޮގްރާމް ހުއްޓުމަކަށް އަންނާނެ ކަމަށެވެ.
ޑަކްޓަރުގެ މި އަމަލާ ގުޅިގެން ގިނަ ބައެއްގެ ތަޢުރީފް ދަނީ އޮހެމުންނެވެ. އަދި ބައެއް ފަރާތްތަކުން ބުނަމުން އަންނަނީ ޑޮކްޓަރު ދައްކައި ދިނީ ނުބައި ނަމޫނާއެއް ކަަމަށާއި ފުރާނައަށް ވުރެ މުހިންމު އެއްޗެއް އެފަދަ ހާލަތުގައި ނޯންނާނެ ކަމަށެވެ.
މިހާތަނަށް ބެލި ބެލުމުން އަލިފާން ރޯވެފައި ވަނީ އިލެކްޓްރިކް ޝޯޓޭޖަކުންކަން ވަނީ ހާމަވެފައެވެ.
