ކާފިއު ވަގުތާއި ވެހިކަލް ދުއްވުން މަނާ ގަޑިތައް 14 ދުވަހަށް އިތުރުކޮށްފި
ކޮވިޑް-19 އިން ރައްކާތެރިވުމުގެ ގޮތުން މާލޭގައި އަޅާފައިވާ ފިޔަވަޅުތަކުގެ މުއްދަތު އިތުރު 14 ދުވަހަށް އިތުރުކޮށްފިއެވެ.
އެޗްޕީއޭއިން ކޮށްފައިވާ އިޢުލާނެއްގައި ބުނެފައިވަނީ 2021 ފެބުރުވަރީ 2 ވީ އަންގާރަ ދުވަހު އަންގައިފައިވާ ނަންބަރު 2021/2 އެންގުމުގެ ދަށުން 14 (ސާދަ) ދުވަހުގެ މުއްދަތަށް އަޅައިފައިވާ ފިޔަވަޅުތައް، 2021 ފެބުރުވަރީ 17 ވަނަ ދުވަހުން ފެށިގެން، އިތުރު 14 (ސާދަ) ދުވަހުގެ މުއްދަތަށް އިތުރުކުރުމަށް ނިންމާފައިވާ ކަމަށެވެ.
14 ދުވަހުގެ މުއްދަތަށް އެޅުމަށް ނިންމައިފައިވާ ފިޔަވަޅުތަކަކީ؛
1. މާލެ ސަރަޙައްދު (މާލެއާއި، ހުޅުމާލެއާއި، ވިލިމާލެއާއި، ތިލަފުށްޓާއި، ގުޅީފަޅާއި، ހުޅުލެ) ގައި ރޭގަނޑު 11:00 އިން ފެށިގެން ފަތިހު 4:30 އަށް، މަގުމައްޗާއި އާންމު ތަންތަނަށް މީހުން ނުކުތުން މަނާކުރުން.
2. މާލެ ސަރަޙައްދު (މާލެއާއި، ހުޅުމާލެއާއި، ވިލިމާލެއާއި، ތިލަފުށްޓާއި، ގުޅީފަޅާއި، ހުޅުލެ) ގައި އިރުއޮއްސި 6:00 އިން ފެށިގެން ހެނދުނު 6:00 އަށް، އެއްގަމު އުޅަނދުފަހަރު ދުއްވުން މަނާކުރުން.
3. ޕާކުތަކާއި މައިޒާންތަކަށް ޒިޔާރަތްކުރުން ހުއްޓައިލުން. އެހެންނަމަވެސް ކަސްރަތުކުރުމަށް ކަނޑައަޅައިފައިވާ ޕާކުތަކުގައި، ހެލްތް ޕްރޮޓެކްޝަން އެޖެންސީން ކަނޑައަޅާ ގައިޑްލައިނާ އެއްގޮތަށް ކުރިޔަށް ގެންދިޔުން.
4. ޔުނިވަރރސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކްލާސްތައް ކުރިޔަށް ގެންދިޔުން ހުއްޓައިލުން.
5. އެކަނި ކުރާ ކަސްރަތުތައް ފިޔަވައި، ކުޅިވަރު ހަރާތްތަކާއި ކަސްރަތު ހަރަކާތްތައް ހުއްޓައިލުން.
ރާއްޖޭގައި އަނެއްކާވެސް ކޮވިޑް-19 ހަލުވިކަމާއެކު ފެތުރެމުން ދާއިރު، ގިނަ މީހުން ފައްސި ވެފައިވަނީ މާލެ ސަރަޙައްދުންނެވެ. އެހެންކަމުން ކޮވިޑް ކޮންޓްރޯލް ކުރުމަށްޓަކައި އެޗްޕީއޭގެ ފަރާތުން މާލޭގައި އަޅާފައިވާ ފިޔަވަޅުތައް އަތޮޅުތެރެއަށްވުރެ ގިނައެވެ.
