ފަޅުރަށުގައި މަރުވެފައި އޮއްވާ ފެނުނީ ލަންކާއިން މަސްވެރިކަމަށް ނިކުތް މީހެއް: ފުލުހުން
ވ. ފޮއްތެޔޮ ބޮޑުފުށީގައި މަރުވެފައި އޮއްވާ ފެނުނީ ލަންކާއިން މަސްވެރިކަމަށް ނިކުތް މީހެއް ކަމަށް ފުލުހުން ވިދާޅުވެއްޖެއެވެ.
ފުލުހުންގެ މީޑިއާ އޮފިޝަލަކު ވިދާޅުވީ މިހާތަނަށް ލިބިފައިވާ މައުލޫމާތަށް ބަލާއިރު ވ. އަންބަރާ ބޭރުން ޑިންގީ އެއްގައި ފެނުނު މީހާއާއި ވ. ފޮއްތެޔޮ ބޮޑުފުށިން ފެނުނު މީހާއަކީ 30 ޖެނުއަރީ 2021 ވަނަ ދުވަހު ލަންކާއިން މަސްވެރިކަމަށް ނުކުމެ ބެހިގެން އެހިސާބަށް ދިޔަ ބައެއްކަން އެނގިފައިވާ ކަމަށެވެ.
ފުލުހުން ވިދާޅުވީ މިމައްސަލައިގައި އިތުރަށް ސާފު ކުރަން ޖެހޭ މައުލޫމާތު ކަމާ ގުޅުން ހުރި ރަސްމީ އިދާރާތައް މެދުވެރިކޮށް ސާފު ކުރަމުންދާ ކަމަށެވެ.
އޮޔާދިޔަ ޑިންގީއެއްގައި ހުރި ލަންކާ މީހަކު "މޯލްޑިވިއާނާ" ނަމަކަށް ކިޔާ ސަފާރީއެއްގައި ތިބި މީހުންނަށް ފެނިގެން އިއްޔެ 17:12 ހާއިރު ވަނީ އެމްއެންޑީއެފް އަށް އަންގާފައެވެ.
ކޯސްޓްގާޑުގެ ބެލުމުގެ ދަށުން ޑިންގީއާއެކު އެމީހާ ވ.ފެލިދޫ އަށް ގެންގޮސް 19:25 ހާއިރު ވަނީ ފުލުހުންނާ ހަވާލު ކޮށްފައި ކަމަށް ވެސް އެމްއެންޑީއެފުން އިއްޔެ ބުނެފައި ވެއެވެ.
އިއްޔެ 11:02 ހާއިރު ވ. ފޮއްތެޔޮ ބޮޑުފުށިން މަރުވެފައި އޮތް މީހެއްގެ ހަށިގަނޑު ފެނިފައިވާއިރު، އެއީ ވެސް ލަންކާ މީހެކެވެ. ފުލުހުން ވިދާޅުވީ މަރުވި މީހާގެ ހަށިގަނޑު ފެނިފައިވަނީ ދަނޑި ކަނޑަން އެރަށަށް ގޮސް އުޅުނު ބަޔަކަށް ކަމަށެވެ.
