އަނބިމީހާގެ ގަޔަށް ހަރުފައެއް ވިހަލާން ދޫކޮށްލައިގެން ހުރީ ފައިސާގެ ދަހިވެތިކަމުގައި
ފައިސާ އާއި މުދަލުގެ ދަހިވެތިކަމުގައި ހަރުފައެއް ބޭނުން ކޮށްގެން އިންޑިއާގެ ފިރިހެނަކު އޭނާގެ އަނބިމީހާ މަރާލައިފިއެވެ.
ސޫރަޖް ނަމަކަށް ކިޔާ މި މީހާ މިކަން ކުރަން މަސައްކަތް ކުރި ފުރަތަމަ ފަހަރު އެކަން ކާމިޔާބު ވެފައި ނުވާއިރުު ދެވަނަ ފަހަރަށް ވެސް އޭނާ އެކަން ކުރަން މަސައްކަތްކޮށް އެކަން ވަނީ ކާމިޔާބު ކޮށްފައެވެ. މިކަން އަންހެންމީހާގެ އާއިލާގެ ސަމާލުކަމަށް އައީ ވެސް އެހެން ވެގެންނެވެ. ތިން މަސް ދުވަސް ތެރޭގައި ދެ ފަހަރަށް ހަރުފައެއް އޭނާގެ ގަޔަށް ވިހަލުމުންނެވެ.
މި މައްސަލަ ފުލުހުން ބަލައި ތަހުގީގު ކުރުމުން އެނގުނީ މިއީ ސޫރަޖް ރާވައިގެން ކުރި ކަމެއް ކަމެވެ. އަދި އޭނާ ރާވައިގެން ހުރީ އަނބިމީހާގެ މުދަލާއި ފައިސާ ލިބުމުން އެހެން ކައިވެންޏެއް ކުރަން ކަމަށް ވެސް ފުލުހުންގެ ތަހުގީގުން ވަނީ އެނގިފައެވެ،
ސޫރަޖް ވަނީ އޭނާގެ އަނބިމީހާ މަރާލުމަށް ޓަކައި އޭނާގެ އެކުވެރިއެއްގެ އަތުން ހަރުފައެއް ގަނެފައެވެ. އަދި އޭނާ ވަނީ ހަރުފަ ގެންގުޅުމުގެ ހުނަރުތައް ޔޫޓިއުބުން ބަލައިގެން ދަސްކޮށްފައި ކަމަށް ވެސް ފުލުހުންގެ ތަހުގީގުން ވަނީ ހާމަވެފައެވެ. އޭނާގެ އަނބިމީހާ މަރާލުމަށްޓަކައި ސޫރަޖް ހަރުފަ އަނބިމީހާގެ ގާތަށް ލީ އޭނާ ނިދާފައި އޮއްވާއެވެ.
މީގެ އިތުރުން ފުލުހުންގެ ތަހުގީގުން އެނގުނު ގޮތުގައި، ސޫރަޖް ވަނީ އޭނާގެ އަނބިމީހާގެ ގަޔަށް ހަރުފަ ވިހަ ލާ މަންޒަރު ބަލަން ހުރެފައެވެ.
ގަސްތުގައި މީހަކު މެރިކަމުގެ ތުހުމަތުކޮށް ސޫރަޖް މިހާރު ހައްޔަރު ކުރެވިފައި ވާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.
