މާލޭ މަގުމަތީގައި އަންހެނުންތަކެއް ހިންގި މާރާމާރީގެ މައްސަލަ ބަލަނީ
ރޭ މާލޭ މަގުމަތީގައި އަންހެނުން ތަކެއް ހަމަނުޖެހުން ހިންގި މައްސަލައެއް ފުލުހުން ބަލަން ފަށައިފިއެވެ.
ފުލުހުން މިއަދު ވިދާޅުވީ ހެންވޭރު ބޮޑުފުންގަނޑު މަގުގައި ހަމަނުޖެހުން ހިނގަމުން ދާ ކަމުގެ މައުލޫމާތު ފުލުހުންނަށް ލިބުނީ ރޭ 9:52 ހާއިރު ކަމަށާއި އެ މައްސަލައާ ގުޅިގެން ފުލުހުން އެ ސަރަހައްދަށް ދިޔައިރު ހަމަނުޖެހުން ހިންގި މީހުން އެ ސަރަހައްދު ދޫކޮށް ގޮސްފައިވާ ކަމަށެވެ.
އެކަމާ ގުޅިގެން އިތުރު މައުލޫމާތު ސާފުކޮށް ބަލަން ޖެހޭ ކަންކަން ބަލަމުން އަންނަ ކަމަށް ވެސް ފުލުހުން ވިދާޅުވިއެވެ.
މިމާރާމާރީ ގެ ވީޑިއޯއެއް މީސް މީޑިއާގައި އާއްމުވެފައިވާއިރު، އެވީޑިއޯއިން ފެންނަ ގޮތުގައި ދެއަންހެނަކު ވަނީ މަގުމަތީގައި ހުރި އަންހެނަކާ ޒުވާބުކޮށް އޭނާ މަގުމައްޗަށް ވައްޓާލާފައެވެ. އަދި މަގުމައްޗަށް ވެއްޓުނު މީހާ ތެދުވެ އޭނާއަށް ހަމަލާދިން ދެމީހުންގެ ތެރެއިން އެކަކަށް ހަމަލާ ދިނުމަށް މަސައްކަތް ކުރި ނަމަވެސް އެތަނުގައި ހުރި ފިރިހެނަކު އެކަމަށް ހުރަސް އެޅުމުން ބޮޑު މާރާމާރީއަކަށް އެކަން ނުވިއެވެ.
ފިރިހެން މީހާ އެމީހުން ހުއްޓުވުމުން އެކަކު އަނެކަކަށް ހަމަލާ ނުދެވުނު ނަމަވެސް، އެމީހުން ވަނީ މަގުމަތީގައި ހަޑިހުތުރު ބަހުން އެއްޗިހި ގޮވާފައެވެ.
މާރާމާރީ ހިންގި ތިން އަންހެނުން، ދެއްކި ވާހަކަތަކަށް ބަލާއިރު ބެލެވެނީ ކަމަކާ ގުޅޭގޮތުން ރިޕޯޓެއް ކޮށްގެން ހިތްހަމަ ނުޖެހުން ފާޅު ކުރި ކަމަށެވެ.
Ads by STO
