އަޅާފައިވާ ފިޔަވަޅުތަކުން އެކަށީގެންވާ ނަތީޖާއެއް ނުފެނޭ: ޑރ. ޝަހީދު
ކޮވިޑް-19 ފެތުރުން ކޮންޓްރޯލް ކުރަން އަޅާފައިވާ ފިޔަވަޅުތަކުން އެކަށީގެންވާ ނަތީޖާތަކެއް އަދި ނުފެންނަ ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
އެ ސެންޓަރުން މިހާރު ކުރިއަށްގެންދާ ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގްރޫޕްގެ ފަރާތުން ބައިވެރިވެވަޑައިގެންނެވި ޑރ. އަހްމަދު ޝަހީދު ވަނީ ކޮވިޑްގެ ތިން ރާޅާ ގުޅިގެން ރާއްޖޭގައި އެޅި ފިޔަވަޅުތަކާއި، އެ ފިޔަވަޅުތަކަށްފަހު މީހުން ވައިރަހަށް ފައްސިވާ އަދަދަށް އައިސްފައިވާ ބަދަލުތައް ހިއްސާ ކުރައްވައިފައެވެ.
އެގޮތުން ގްރާފްތަކަށް ބަލާއިރު، ތިން ވަނަ ޕީކާ ގުޅިގެން އެޅި ފިޔަވަޅުތަކުން އެންމެ އެކަށީގެންވާ ނަތީޖާ ނުފެންނަ ކަމަށް ޑރ. ޝަހީދު ވިދާޅުވިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައިވަނީ މާލެއިން 145 މީހުންނާއި، އަތޮޅުތެރެއިން 10 މީހަކާއި ހިންގަމުން އަންނަ ރިސޯޓުތަކުން 24 މީހެއްގެ އިތުރުން އިންޑަސްޓްރިއަލް އައިލެންޑްސް އިން 5 މީހެކެވެ.
މިހާރު ރާއްޖެއިން މިބައްޔަށް ޖުމްލަ 19،346 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައިވަނީ ޖުމްލަ 16،838 މީހުންނެވެ. އަދި މިބަލީގައި ރާއްޖެއިން 60 މީހުން ނިޔާވެެއްޖެއެވެ.
ހޮސްޕިޓަލުތަކުގައި މިހާރު ފަރުވާ ހޯދަމުން ދަނީ 162 މީހުންނެވެ.
ރާއްޖެއިން ކޮވިޑަށް ޓެސްޓު ކުރަން މިހާރު 510،506 ސާމްޕަލް ނަގައިފައިވެއެވެ.
Ads by STO
