ފެނަކަ ކޯޕަރޭޝަންގައި ކޮރަޕްޝަން ހިނގަމުންދާ ކަމުގެ ތުހުމަތުތައް އެކުންފުނިން ދޮގު ކޮށްފި
ފެނަކަ ކޯޕަރޭޝަންގައި ކޮރަޕްޝަނަށް މަގުފަހިވާ ކަންކަން ހިނގަމުންދާ ކަމަށް ބުނެ ކޮށްފައިވާ ތުހުމަތުތައް އެކުންފުނިން ދޮގު ކޮށްފިއެވެ.
މިކަމާ ގުޅޭގޮތުން އެކުންފުނިން ނެރުނު ބަޔާނެއްގައި ބުނީ، އެ ތުހުމަތުތަކަކީ ކުންފުނީގެ މިހާރުގެ މެނޭޖްމަންޓުން ކުންފުންޏަށް ހޯދައިދެމުންދާ ކުރިއެރުންތަކާއި ކާމިޔާބީތަކާމެދު ހަސަދަވެރި ނިޔަތެއް އޮވެގެން، މެނޭޖްމަންޓާއި މުވައްޒަފުންގެ އަގު ވައްޓާލުމަށް، އެއްވެސް ޒިންމާދާރު ކަމެއް ނެތި ބަޔަކު ފަތުރަމުންދާ ވާހަކަތަކެއް ކަމަށެވެ.
ފެނަކައިން ބުނީ އެކުންފުނިން ރައްޔިތުންނަށް ޚިދުމަތް ދިނުމަށް ކުރަންޖެހޭ މަސައްކަތްތައް ކުރަމުން ދަނީ ތެދުވެރިކަމާއި އަމާނާތްތެރިކަމާއެކު ކަމަށާއި އަދި އެނޫން މަގަކުން ކަންކަން ނުހިނގާނެކަމުގެ ޔަގީން އަރުވާ ކަމަށާއި މިކަން ކަށަވަރު ކުރުމަށްޓަކައި ހަރުދަނާ ގިނަ ފިޔަވަޅުތަކެއް އަޅައި، އެފަދަ ކަންކަމަށް ފާރަވެރިވެ، ޖަވާބުދާރީ ކުރެވޭނެ އެކަށީގެންވާ ނިޒާމުތަކެއް އެ ކުންފުނީގައި ގާއިމު ކޮށްފައި ވާނެ ކަމަށެވެ.
ފެނަކައިން މިހެން ބުނެފައިވާއިރު، އެކުންފުނީގައި ކޮރަޕްޝަނަށް މަގުފަހިވާ ގޮތަށް ބައެއް ކަންކަން ހިނގަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ރައީސުލްޖުމްހޫރިއްޔާގެ ސަމާލުކަމަށް ގެނެސްފައިވާ ކަމަށް ބުނެ އޮންލައިން ނޫސް 'މިހާރު' އިން ވަނީ ރިޕޯޓުކޮށްފައެވެ. އެ ރިޕޯޓުކޮށްފައިވާ ގޮތުގައި މި މައްސަލަތަކަކީ ފެނަކައިގެ މެނޭޖިން ޑިރެކްޓަރު އަހްމަދު ސައީދަށް ތުހުމަތުކޮށް ހުށަހެޅިފައިވާ މައްސަލަތަކެކެވެ.
