އެންޓި ކެމްޕޭން ކުރާތީ މުއިއްޒުގެ ސުވާލެއް!
ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް ބައެއް ފަރާތްތަކުން އެންޓި ކެމްޕެއިން ކުރަމުންދާތީ މާލޭގެ މޭޔަރު ކަމަށް ވާދަ ކުރައްވާ ކެނޑިޑޭޓް ޑރ.މުހައްމަދު މުއިއްޒު އެކަމާ ގުޅިގެން ޚިޔާލު ފާޅު ކުރައްވައިފިއެވެ.
މުއިއްޒު ކުރެއްވި ޓްވީޓެއްގައި އެކަން ފާހަގަ ކޮށް ސުވާލު ކުރައްވާފައި ވަނީ އެހާ ބޮޑަށް އެންޓި ކެމްޕޭން ކުރައްވަނީ ކީއްވެތޯއެވެ.
އެންޓި ކެމްޕޭން ކުރައްވަނީ ކޮންބައެއްކަން އަދި ކޮން ކެނޑިޑޭޓަކާ ދެކޮޅަށްކަން މުއިއްޒު ވިދާޅުނުވި ނަމަވެސް އެމަނިކުފާނާ ދެކޮޅު އެންޓި ކެމްޕެއިންތައް ވަރަށް ގިނައިން މީސްމީޑިއާއިން ފެންނަމުން ދެއެވެ. ޚާއްޞަކޮށް މާލޭ މޭޔަރު ކަމަށް ވާދަ ކުރައްވާ އަނަސް އަބުދުއްސައްތާރުގެ މުޅި ކެމްޕެއިނުން އަބަދުމެ އިވެނީ މުއިއްޒާ ގުޅޭ ކޮންމެ ވެސް ވާހަކައެވެ. އަނަސް މާލެއަށް ކޮށްދެއްވާނެ ކަންކަމުގެ އަޑު އިވެނީ މަދު ފަހަރެއްގައެވެ. އެގޮތުން އެމަނިކުފާނު މަގާމަށް ހޮވިއްޖެނަމަ ހުޅުމާލެ ، މާލޭ ސިޓީގެ ދަށަށް ގެންނަވާނެ ކަމަށް ވިދާޅުވިއެވެ.
މާލޭގެ މޭޔަރު ކަމަށް ޕީޕީއެމުން ޑރ. މުހައްމަދު މުއިއްޒު ވާދަކުރައްވާއިރު އެމްޑީޕީން ވާދަ ކުރައްވަނީ އެ ޕާޓީގެ ކުރީގެ ސެކްރެޓަރީ ޖެނެރަލް އަނަސް އަބުދުއްސައްތާރެވެ.
މާލޭ ސިޓީގެ ދަށަށް ހުޅުމާލެ ގެނައުމުގެ ވައުދަކީ ތާކުން ތާކު ނުޖެހޭ ބޮޑު ޖޯކެއް. އަނަސް ހޮވިއްޖެނަމަ، ރާއްޖޭގެ ހުރިހާ ފަޅުރަށްތައް ދައުލަތުގެ ބެލުމުގެ ދޮށަށް ގެންދާނަމޭ ބުނަންވީ ނޫންތޯ؟ ހައިރާންނެއް ނުވާނެތޯ! ހުޅުމާލެ މިހާރު އޮންނަނީ މާލޭ ސިޓީގެ ދަށަކު ނޫންތޯ؟