އެންމެ ބޮޑު އަމާޒަކީ ގެދޮރުވެރިކަމުގެ މައްސަލަ ޙައްލު ކުރުން: މުޢިއްޒު
ޕީޕީއެމް ކެނޑިޑޭޓުންގެ އެންމެ ބޮޑު އަމާޒަކީ ގެދޮރުވެރިކަމުގެ މައްސަލަ ޙައްލު ކުރުން ކަމަށް ކުރީގެ ހައުސިން މިނިސްޓަރު އަދި މާލެ ސިޓީ މޭޔަރުކަމަށް ޕީޕީއެމްގެ ފަރާތުން ކުރިމަތިލައްވާފައިވާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އިދިކޮޅު ކޯލިޝަނުން މިރޭ ބޭއްވި "މީ މަގޭ ރާއްޖެ" ކެމްޕެއިން ރީލޯންޗުކުރުމުގެ ޖަލްސާގައި މިރޭ ވާހަކަފުޅު ދައްކަވަމުން ޑރ. މުއިއްޒު ވިދާޅުވީ މިއަދު މާލޭގެ ރައްޔިތުންނަށްނަށާއި ރާއްޖޭގެ ހުރިހާ ރައްޔިތުންނަށް ދިމާވެފައިވާ އެންމެ ބޮޑު އެއް މަސައްލައަކީ ގެދޮރުވެރިކަމުގެ މައްސަލަ ކަމަށެވެ. އަދި އެ މައްސަލަ އެންމެ ބޮޑު، މާލެ ސިޓީގައި މައްސަލަ ޙައްލުކޮށްދިނުމަށް ސިޓީ ކައުންސިލުން އުޅެން ޖެހޭނެ ކަަމަށްވެސް މުޢިއްޒު ވިދާޅުވިއެވެ.
މުޢިއްޒު އިތުރަށް ވިދާޅުވީ، ރައްޔިތުން ވޯޓް ދީފައި ކައުންސިލަށް ހޮވާ ފަރާތްތަކަކީ ރައްޔިތުންގެ ވިންދާ އެކީގައި، ރައްޔިތުންގެ ޙައްޤުގައި މަސައްކަތް ކުރާނެ ފަރާތްތަކަށް ކަމަށާއި އެނޫން ފަރާތްތައް ހޮވުމުގެ ބޭނުމެއް ނެތް ކަމަށެވެ.
ގުޅީފަޅުގެ މަޝްރޫޢުއަށް އިޝާރަތް ކުރައްވާ މުޢިއްޒު ވިދާޅުވީ، ސަރުކާރުން ރައްޔިތުންގެ އިޙްސާސްތަކާ އެއްގޮތަށް މަސައްކަތް ނުކުރާކަން މިޕްރޮޖެކްޓުންވެސް ހާމަވެގެންދާ ކަމަށެވެ. މިގޮތުން، މިއީ ގެދޮވެރިވެރިކަމުގެ މައްސަލަ ޙައްލު ކުރަން ފެށި ޕްރޮޖެކްޓެއް ނަަމަވެސް އެތަނުގައި އެހެން މަސައްކަތް ކުރަން ސަރުކާރުން ނިންމާފައިވާތީ، ރައްޔިތުން މިއަދު މާޔޫސްވެފައިވާކަމަށް މުޢިއްޒު ސިފަ ކުރެއްވިއެވެ.
"ސަރުކާރުގެ ސިޔާސަތު ބައްޓަން ވެފައި އޮންނަން ޖެހޭނީ ރައްޔިތުންނާ އެކީގައި މަސައްކަތް ކުރުމުގައި. ކައިރީގައި އޮންނަ ގުޅީފަޅަކީ، ނުވަތަ އެހެން ފަޅަކީ ރައްޔިތުންގެ ގެދޮރުވެރި ކަމަށް އޮތްތަނެއް ކަަމަށް އަޅުގަނޑުމެން އެންމެން ވާހަކަ ދައްކަމުންދާއިރުގައި، އެކަން އެބަޖެހޭ ރައްޔިތުންނަށްޓަކައި ބައްޓަން ކުރަން." މުޢިއްޒު ވިދާޅުވިއެވެ.
މުޢިއްޒު އިތުރަށް ވިދާޅުވީ، މާލޭ ސިޓީކައުންސިލަށް ރައްޔިތުންނަށް އާއްމުދަނީ ހޯދަދެވޭނެ ގޮތްތައް އެބަހުރި ކަމަށާއި މީގެ ކުރިން މިކަންކޮށްފައި ނުވުމަކީ ކުރާނެ ގޮތް ނެތުން ނޫން ކަމަށެވެ. މިގޮތުން މާލޭގެ ޒުވާނުންނަކީ ބިކަވާން ދޫކޮށްލެވިފައިތިބި ބަޔަކަށް ވެގެން ނުވާނެ ކަމަށާއި އެމީހުންގެ ކިބައިން މުޖުތަމަޢަށް ފައިދާ ހުރި ކަންކަން ނެރެވޭނެ ކަމަށާއި އެކަން ކުރާ ބަޔަކަށް ސިޓީ ކައުންސިލްވާން ޖެހޭ ކަމަށްވެސް މުޢިއްޒު ވިދާޅުވިއެވެ. އަދި އެކަން ކުރާނެ ގޮތުގެ ޕްލޭންއާއި ވިސްނުން، މުޢިއްޒުއާއި ޕީޕީއެމްއިން ކައުންސިލަށް ނިކުމެތިބި ފަރާތްތަކުގައި އެބަހުރި ކަމަށް ފާހަގަ ކުރެއްވިއެވެ.
މުޢިއްޒުގެ ވާހަކަފުޅުގައި އިތުރަށް ވިދާޅުވީ، މާލޭގެ ހާލަތު ވަރަށް ގޯސް ކަމަށާއި ރައްޔިތުން މިއަދު ބިކަވެފައި ކަމަށާއި ކުދި ވިޔަފާރިތައް މިއަދު ބަގުރޫޓްވެފައިވާ ކަމަށެވެ. އަދި މިއަދު އިދިކޮޅު ފަރާތްތަކުން ކައުސިލް އިންތިޚާބަށް ނިކުތީ، ވަރަށް ސީރިޔަސް ކަމަށާއި މައްސަލަތައް ޙައްލު ކުރަން ފަށާނީ ކައުންސިލްތަކުގެ ހަމައިން ކަމަށްވެސް މުޢިއްޒު ވިދާޅުވިއެވެ.
"އަޅުގަނޑުމެން ނިކުމެ މިތިބީ ސަމާސާ ކުރާކަށް މަޖާކުރާކަށް ނޫން. މިއީ ވަރަށް ސީރިޔަސް ޒިންމާއެއް ވަރަށް ސީރިޔަސް މައްސަލައެއް." މުޢިއްޒު ވިދާޅުވިއެވެ.
މުޢިއްޒު ވިދާޅުވީ، މިއަންނަ މަހު އޭޕްރީލް މަހު 10 ވަނަ ދުވަހު ރައްޔިތުންނަށް "ޗޮއިސް" އެއް އެބަ އޮތް ކަމަށާއި ކަމަށް ޤާބިލް، ތަޖުރިބާ ހުރި ކެނޑިޑޭޓަކު ހޮވާނެ ކަމަށް އުންމީދު ކުރައްވާ ކަމަށެވެ.
"މިކަމުގައި އަޅުގަނޑުގެ ތަޖުރިބާ އެބަހުރި. ހަ އަހަރާއި ނުވަ މަސްދުވަހު މިނިސްޓްރީއެއް ހިންގިން. 127 ރަށެއްގެ ބަނދަރު ހަދައިދިނިން. 97 ކިލޯމީޓަރުގެ މަގު ރާއްޖޭގެ އެކި ރަށްރަށުގައި ހަދައިދިނިން. 16 ރަށެއްގެ ބިން ހިއްކައިދިނިން. މާލެއާއި އަތޮޅުތެރޭގަ އެތައް ހާސް ހައުސިން ޔުނިޓެއް އަޅައިދިނިން." މުޢިއްޒު ވިދާޅުވިއެވެ.
