ޕްލޭނިން މިނިސްޓްރީއަށް އިތުރު ސިޔާސީ ބޭފުޅަކު އައްޔަން ކޮށްފި
މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރއަށް އިތުރު ސިޔާސީ ބޭފުޅަކު އައްޔަން ކުރައްވައިފިއެވެ.
ރައީސް އިބްރާހިމް މުހައްމަދު ޞާލިހު ސިޔާސީ ވެރިއަކު އައްޔަން ކޮށްފައި ވަނީ އެ މިނިސްޓްރީގެ ސީނިއަރ އެގްޒެކެޓުވް ޑިރެކްޓަރެއްގެ މަޤާމަށެވެ. އެ މަޤާމަށް އައްޔަން ކޮށްފައިވަނީ ގއ.ވިލިނގިލީ، އަކާޝް، އަމީޒް ހަސަންއެވެ.
ރައީސް އޮފީހުގެ މިނިސްޓަރު މުހައްމަދު ޝިފާޒު ސޮއި ކުރައްވާ އަމީޒަށް ފޮނުއްވާފައިވާ ސިޓީގައި ޤާނޫނު އަސާސީން ރައީސުލްޖުމްހޫރިއްޔާއަށް އެމަނިކުފާނުގެ ޒިންމާތައް އަދާކުރެއްވުމަށް މަޤާމުތަކަށް ބޭފުޅުން އައްޔަން ކުރައްވަން ލިބިވަޑައިގަންނަވާ ބާރުގެ ދަށުން އޭނާ އެމަޤާމަށް ހަމަޖެއްސެވިކަން ވަނީ އަންގަވާފައެވެ.
އަމީޒަކީ ގއ.ވިލިނގިލީގައި އެމްޑީޕީގެ ހަރަކާތްތަކުގައި އިސްކޮށް އުޅުއްވާ އެމްޑީޕީގެ އެކްޓިވިސްޓެކެވެ. ރައީސް ޞާލިހުގެ ރިޔާސީ ވައުދުތަކުގެ ތެރޭގައި ސިޔާސީ މަޤާމުތައް މަދު ކުރައްވާނެ ކަމަށް ވަނީ ވައުދުވެ ވަޑައިގެންފައެވެ.
