ޢިޔާޟްގެ އާދޭސް: އަޅުގަނޑަށް އަނިޔާ ކުރިޔަސް ކޯލިޝަން ރޫޅާނުލާތި!
އެންމެ މީހެއްގެ މަސްލަޙަތަށް ވުރެ ޤައުމުގެ އަގުބޮޑު ކަމަށާއި އެމަނިކުފާނަށް އަނިޔާ ކުރި ނަމަވެސް ކޯލިޝަން ރޫޅާ ނުލުމަށް ޑރ. މުޙައްމަދު ޢިޔާޟް ޢަބްދުއްލަތީފު އެދިލައްވައިފިއެވެ.
ދާދި ފަހުން ރާއްޖޭގެ ޤައުމީ ޔުނިވާސިޓީ (އެންއެންޔޫ) އިން ޑރ.ޢިޔާޟް ސަސްޕެންޑް ކޮށްފައިވާއިރު، އެމަނިކުފާނު މިއަދު ކުރެއްވި ޓްވީޓެއްގައި ވިދާޅުވީ އެންމެ މީހެއްގެ މަސްލަޙަތަށްވުރެ ޤައުމުގެ އަގު ބޮޑު ކަމަށެވެ.
"ވީމާ ވަކި ފަރުދަކާމެދު ކުރެވޭ އަނިޔާއަކާ ހުރެ މުޅި ދައުލަަތަށް ގެއްލުން ދިނުމަކީ ކޮށްގެން ވާނެ ކަމެއް ނޫން. އަޅުގަނޑު އެމްއެންޔޫ އިން ވަކި ކުރި ނަމަވެސް އަދާލަތު ޕާޓީ ސަރުކާރުގައި ދެމިއޮތުމަށް އިލްތިމާސް ކުރަން" ޑރ. ޢިޔާޟް ވިދާޅުވިއެވެ.
މި މަހުގެ 4ވަނަ ދުވަހު އެމްއެންޔޫ އިން ޑރ. ޢިޔާޟް ސަސްޕެންޑު ކުރީ 14 ދުވަހުގެ މުއްދަތަކަށެވެ.
ސަސްޕެންޑު ކުރީ މީސް މީޑިއާގައި ލިޔުއްވާ ބައެއް ލިޔުންތަކާ ގުޅިގެން، އާންމުންގެ ފަރާތުން ބައެއް ޝަކުވާ އައިސްފައިވާތީ ކަމަށް އެ ޔުނިވާސިޓީން ބުނި ކަމަށް ޑރ. ޢިޔާޟް މީގެ ކުރިން ވަނީ "ދެން" އަށް މައުލޫމާތު ދެއްވަމުން ވިދާޅުވެފައެވެ.
ޑރ. ޢިޔާޟް އަކީ ސަރުކާރު ކޯލިޝަންގައި ހިމެނޭ އަދާލަތު ޕާޓީގެ މެމްބަރަކަށްވާއިރު، އެމަނިކުފާނުގެ ސަސްޕެންޝަނާ ގުޅިގެން އަދާލަތު ޕާޓީއާއި އެޕާޓީގެ ލީޑަރު އަދި ހޯމް މިނިސްޓަރ އިމްރާން ޢަބްދުﷲ ހަނު ހުންނަވާތީ، އެތައް ބަޔަކު އަންނަނީ އެކަމާ ސުވާލުކޮށް ފާޑު ވިދާޅުވަމުންނެވެ.
Ads by STO
