ފެނަކައަކުން ވައްކަމެއް ނުކުރާނެ، ފެނަކައިން ރައްޔިތުންނަށް ދޭނީ ޚިދުމަތް: އެމްޑީ ސަޢީދު
ފެނަކަ ކޯޕަރޭޝަނުން ވައްކަން ނުކުރާނެ ކަމަށާއި އެކުންފުނީގެ އަމާޒަކީ ރައްޔިތުންނަށް ބޭނުންވާ ޚިދުމަތްތައް އޭގެ އެންމެ ހަލުވި މިނުގައި ފޯރު ކޮށްދިނުން ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދުގެ ވިދާޅުވެއްޖެއެވެ.
އ.މާމެންދޫގައި ޤާއިމްކޮށްފައިވާ ވާރޭފެނުގެ ނިޒާމު ފެނަކަ ކޯޕަރޭޝަނާއި ހަވާލު ކުރުމަށް މިއަދު އެރަށުގައި ބޭއްވި ރަސްމިއްޔާތުގައި ވާހަަކަފުޅު ދައްކަވަމުން ސަޢީދު ވިދާޅުވީ، ފެނަކައާ ގުޅުވައިގެން ޖެއްސުން ކުރުމަށްޓަކައި ވައްކަމާ ކޮރަޕްޝަންގެ ވާހަކަތައް ދައްކާ ކަމަށާއި ނަަމަވެސް ފެނަކަ ކުންފުނިން އެފަދަ ކަމަކަށް ޖާގަ ނުދޭނެ ކަމަށެވެ.
"އަޅުގަނޑުމެނަށް ޖެއްސުން ކުރާ، ހަސަދަވެރިވާ ބަޔަކު ކިތަންމެ ވައްތަރެއްގެ ހެޑްލައިން އެޅިޔަސް އަޅުގަނޑުމެން ފަހަތަކަށް ނުޖެހޭނަން. ފެނަކައަކުން ވައްކަމެއް ނުކުރާނެ، ފެނަކައިން ދޭނީ ރައްޔިތުންނަށް ޚިދުމަތް" ސަޢީދު ވިދާޅުވިއެވެ.
ސަޢީދުގެ ވާހަކަފުޅުގައި އިތުރަށް ވިދާޅުވީ މިސަރުކާރަކީ އާބާދީއަކަށް ބެލުމެއްނެތި ހަމަހަމަ ކަމާއެކު ރާއްޖޭގެ ހުރިހާ ރައްޔިތުންނަށް ޚިދުމަތް ފޯރު ކޮށްދޭނެ ސަރުކާރެއް ކަމަށާއި މިއަދު މިބޭއްވޭ ރަސްމިއްޔާތުން ވެސް އެކަން ހާމަވެގެންދާނެ ކަމަށެވެ. އަދި މާމެންދޫގެ އާ ފެނަކަ އޮފީސް އިމާރާތާ ފެނަކަ އިންޖީންގޭގެ އިމާރާތް މަސައްކަތް ނިމިފައިހުރިކަން ފާހަގަ ކުރައްވާ ސަޢީދު ވިދާޅުވީ، ވަރަށް އަވަހަށް ޒަމާނީ ނެޓްވޯކަކުން މާމެންދޫގެ ރައްޔިތުންނަށް ކަރަންޓް ލިބޭނެ އިންތިޒާމެއް ހަމަޖެހޭނެ ކަމަށާއި ސަރުކާރުން މިއަދުގެ ސަރުކާރުން އެއްވެސް ރަށެއް ބާކީ ނުކޮށް ހަމަ ހަމަ ކަމާއެކު އެންމެނަށް ޚިދުމަތް ދިނުމަށް ކުރާ މަސައްކަތުގައި ފެނަކައިގެ ދައުރު އަދާ ކުރާނެ ކަަމަށެވެ.
"އަންނަ ހަފްތާގައި މިރަށުގެ ނެޓްވޯކް ބަދަލު ކުރަން ގެންނަން ޖެހޭ ކޭބަލްތައް އަރުވާނަން. އެއާ އެކީ މިރަށުގެ ނެޓްވޯކް ޒަމާނީ ފެންވަރަށް ބަދަލުވެގެންދާނެ" ސަޢީދު ވިދާޅުވިއެވެ.
ރަށްރަށުގައި ވާރޭފެނުގެ ނިޒާމް ޤާއިމްކުރުމުގެ މިމަސައްކަތަކީ ހޫނު މޫސުމުގައި ފެނަށް ޖެހޭ ރަށްރަށަށް ދިމާވާ މައްސަލަތައް ހައްލުކުރުމަށް ސަރުކާރުން ކުރައްވަމުން ގެންދަވާ މަސައްކަތެކެވެ. މާމެންދޫގައި މިދިޔަ އަހަރު މަސައްކަތް ނިމިފައިވާ ވާރޭފެނުގެ ނިޒާމު ފެނަކައާ ހަވާލު ކުރުމަށް މާމެންދޫގައި ބޭއްވި ޚާއްސަ މިރަސްމިއްޔާތުގައި ފެނަކަ އެމްޑީގެ އިތުރުން، އެންވަޔަރަންމަންޓް މިނިސްޓަރ ޑރ.ހުސެއިން ރަޝީދު ހަސަން އާއި އެދާއިރާގެ މެމްބަރު ޔައުގޫބް އަބްދުﷲ ބައިވެރިވެވަޑައިގެންނެވިއެވެ.
