އަދުރޭއާއެކު ޖުމުލަ 24 މީހަކު އިދިކޮޅުގެ މުޒާހަރާއިން ހައްޔަރަށް
އިދިކޮޅު ޕީޕީއެމް/ޕީއެންސީ އިން ކުރިއަށް ގެންދާ ސިލްސިލާ އެއްވުމުގެ ތެރެއިން މިއަދު 24 މީހަކު ހައްުޔަރު ކޮށްފިއެވެ.
ހައްޔަރު ކުރި މީހުންގެ ތެރޭގައި އެ ކޯލިޝަން ހިންގުމާ ހަވާލުވެ ހުންނެވި ލީޑަރު އަބްދުއްރަހީމް އަބްދުﷲ ވެސް ހިމެނެއެވެ. އަދި އޭގެ ތެރޭގައި އެ ޕާޓީގެ ބައެއް ކައުންސިލް މެންބަރުން ވެސް ހިމެނެއެވެ. އެގޮތުން ފުލުހުން ބުނީ ޖުމުލަ 24 މީހަކު ހައްޔަރު ކޮށްފައިވާ ކަމަށެވެ.
މިއަދު ވެސް މުޒާހަރާ ފެށުމުގެ މާ ކުރިން ފުލުހުން ވަނީ ޕީޕީއެމް އޮފީސް ހިމެނޭ ސަރަހައްދު ބަންދު ކޮށްފައެވެ. އަދި ރައީސް އޮފީސް ހިމެނޭ "ގްރީން ޒޯން" ސަރަހައްދު ވެސް ފުލުހުން ބަންދު ކުރިއެވެ. ނަމަވެސް މުޒާހަރާގެ ބައިވެރިން ވަނީ އެކި ހިސާބުތަކަށް އެއްވެ އަޑު އުފުލާފައެވެ. އެގޮތުން މާވެޔޮމަގާ މަޖީދީ މަގު ގުޅޭ ކަންމަތި އަދި ޗާންދަނީ މަގާއި މަޖީދީ މަގުގެ ހަތަރު އަނގޮޅި ހިމެނެއެވެ.
މިދިޔަ ހުކުރު ދުވަހު ކުރި މުޒާހަރާގައި ވަނީ 38 މީހަކު ފުލުހުންގެ ބެލުމުގެ ދަށަށް ގެންގޮސްފައެވެ. ނަމަވެސް ޖޫރިމަނާ ކުރުމަށްފަހު އެމީހުން ވަނީ ދޫކޮށްލައިފައެވެ.
