ނ.ޅޮއްސަށް އަރައި ފޭބުން މަނާކޮށްފި
ނ.އަތޮޅު ޅޮހީގައި ކަރަންޓީންގައި ނެތް ކުއްޖަކު ކޮވިޑް-19 އަށް ފައްސިވުމުން އެރަށް މޮނިޓަރިންގެ ހާލަތަށް ގެނެސް ރަށަށް އަރައި ފޭބުން މަނާ ކޮށްފިއެވެ.
އެޗްޕީއޭ އިން ބުނީ ޅޮހި މޮނީޓަރިންގެ ހާލަތަށް ގެނައުމުން މިވަގުތު އެ ރަށުގައި ތިބި އެއްވެސް މީހަކު އެ އެޖެންސީން ވަކިގޮތެއް އަންގަންދެން ރަށުން ފޭބުމާއި، ހުއްދަނެތި އެއްވެސް މީހަކު އެރަށަށް އެރުމަކީ މަނާ ކަމެއް ކަމަށެވެ.
ޅޮހީގެ އިތުރުން އެޗްޕީއޭ އިން ވަނީ އދ.ފެންފުށި ވެސް މޮނީޓަރިންގެ ހާލަތަށް ގެނެސްފައެވެ. އެރަށް މޮނިޓަރިން އަށް ލެވިފައި ވަނީ ރޯގާ ޖެހިގެން އެރަށު ހެލްތް ސެންޓަރަށް ޑޮކްޓަރަށް ދެއްކި މީހެއް ފައްސި ވުމާ ގުޅިގެންނެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމު ކޮށްފައިވާ ސާވޭލަންސް ޑޭޓާއަށް ބަލާއިރު އިއްޔެ ރާއްޖެއިން ކޮވިޑަށް ފައްސި ވެފައި ވަނީ މާލެއިން 86 މީހުންނާއި، އަތޮޅުތެރެއިން 14 މީހަކާއި، ހިންގަމުން އަންނަ ރިސޯޓުތަކުން 14 މީހެކެވެ.
އިއްޔެ ފައްސިވީ މީހުންނާއެކު މިހާރު ރާއްޖެއިން މިބައްޔަށް ޖުމްލަ 21،268 މީހުން ވަނީ ފައްސި ވެފައެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައިވަނީ ޖުމްލަ 18،695 މީހުންނެވެ. އަދި މިހާތަނަށް މިބަލީގައި ރާއްޖެއިން 64 މީހުން ނިޔާވެެފައި ވެއެވެ.
Ads by STO
