އާޒިމްގެ އާދޭސް: ކޮވިޑް-19 ވެކްސިން ނުޖެހުމުގެ ދެރައާ ހިތާމަ މިދަނީ ތަޖުރިބާ ކުރަމުން، އަވަހަށް ޖައްސަވާ
ކޮވިޑް-19 ވެކްސިން ނުޖެހުމުގެ ދެރައާއި ހިތާމަ އެމަނިކުފާނު އެ ގެންދަވަނީ ތަޖުރިބާ ކުރައްވަމުން ކަމަށާއި ވެކްސިން އަވަހަށް ޖެހުމަށް އެމްޑީޕީގެ ޕާލިމެންޓްރީ ގްރޫޕުގެ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް އިލްތިމާސް ކުރައްވައިފިއެވެ.
ކޮވިޑް-19 ޖެހުނުތާ 5 ވަނަ ދުވަހު އާޒިމް ފޭސްބުކްގައި ޝާއިއު ކުރި ވީޑިއޯއެއްގައި ބުނެފައި ވަނީ މިއަދަކީ ކުޑަކޮށް ފަސޭހަ ދުވަހެއް ކަމަށާއި ނަމަވެސް ވޭން ހުރި ދުވަސްތަކެއް ކަނޑައްތު ކޮށްފައިވާ ކަމަށެވެ.
"ގަދަ ހުމާއި ކޮވިޑް-19 ރޯގާގެ ބިރުވެރި އެހެނިހެން އަލާމާތްތަކަށް ފަހު ތަންކޮޅެއް ފަސޭހަ ތަންކޮޅެއް ލުއި ދުވަހެއް" އާޒިމް ވިދާޅުވިއެވެ.
އާޒިމް އިތުރަށް ވިދާޅުވީ، ކޮވިޑް-19 ރޯގާގެ ވެކްސިން ނުޖެހުމުގެ ދެރައާއި ހިތާމައާއި އުނދަގޫ އެމަނިކުފާނު ތަޖުރިބާ ކުރަމުން އަންނަ ކަމަށާއި އަދި އެމަނިކުފާނުގެ އާދޭހަކީ އެންމެހާ ބޭފުޅުން އަވަހަށް ވަޑައިގެން ވެކްސިން ޖެއްސެވުން ކަމަށެވެ.އަދި ކޮވިޑް-19 އާ ދެކޮޅަށް މަސައްކަތް ކުރާ ފަރާތްތަކަށް އާޒިމް ވަނީ ޝުކުރު ދަންނަވާފައެވެ.
ރާއްޖޭގައި މިހާތަނަށް 188،436 މީހަކު ވެކްސިން ޖަހާފައި ވެއެވެ. މާލޭގައި ކޮވިޑް-19 ވެކްސިންގެ ފުރަތަމަ ޑޯޒް ދިނުމަށް ހަމަޖެހިފައި ވަނީ މިއަންނަ ހޯމަ ދުވަހާ ހަމައަށެވެ.
