ބްރޯޑްކޮމްގެ މެމްބަރުކަމަށް ކުރިމަތިލުމަށް ހުޅުވާލައިފި
މޯލްޑިވްސް ބްރޯޑްކާސްޓިންގ ކޮމިޝަނުގެ ހުސްވެފައިވާ މެންބަރުކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.
ރައީސް އޮފީހުން މިއަދު ނެރުނު އިއުލާނެއްގައި ބުނެފައި ވަނީ ބްރޯޑްކޮމްގެ މެމްބަރެއްގެ މަގާމުގެ މުއްދަތު އަންނަ މަހަށް ހަމަވާތީ، މެންބަރުކަމުގެ މަގާމަށް ކުރިމަތިލުމުގެ ފުރުސަތު މިއަދު ހުޅުވާލާފައިވާ ކަމަށެވެ.
މި ފުރުސަތު ހުޅުވާލާފައިވަނީ މި މަހުގެ 22 ވަނަ ދުވަހުގެ ނިޔަަލަށެވެ.
މަގާމަށް ކުރިމަތިލުމަށް އެދޭ ފޯމު ރައީސް އޮފީހުގެ ރިސެޕްޝަނުންނާއި ރައީސް އޮފީހުގެ ވެބްސައިޓުން ލިބެން ހުންނާނެ ކަމަށް އެ އޮފީހުން ބުނެފައިވެެއެވެ.
އަންނަ މަހު މަގާމުގެ މުއްދަތު ހަމަވަނީ އެ ކޮމިޝަންގެ މެންބަރު މެމްބަރު އާމިނަތު ތަރާހަތު އިއްޒަތު ގެއެވެ.
އެ ކޮމިޝަނުން ހުސްވެފައިވާ މަގާމަކަށް އެންމެ ފަހުން އައްޔަން ކޮށްފައި ވަނީ ރާއްޖެ ޓީވީގެ ނޫސްވެރިޔާ މުހައްމަދު ފަޒީނުއެވެ.
އެކޮމިޝަނަށް ފަޒީން އައްޔަން ކުރުމުން، ގިނަ ބަޔަކު ވަނީ އެކަމަށް ވަރަށް ބޮޑަށް ފާޑުކިޔާފައެވެ. އަދި ފަޒީން އާ ވާދަކުރި ޝިފްޒާ މުސްތަފާ ތައުލީމީ ގޮތުންނާއި ތަޖުރިބާގެ ގޮތުން ބެލި ނަމަވެސް އެ މަގާމަށް މާ ގާބިލްކަމަށް ގިނަ ބަޔަކު ވަނީ ބުނެފައެވެ.
7 މެންބަރުންގެ މައްޗަށް އެކުލެވޭ ބްރޯޑްކާސްޓިން ކޮމިޝަންގައި ހިމެނެނީ ފަޒީންގެ އިތުރުން ކޮމިޝަންގެ ރައީސް މަރިޔަމް ވަހީދާ އާއި، ނައިބު ރައީސް އަޙްމަދު ގައިސް އާއި، މެންބަރު އާމިނަތު ސަރާޙަތު ޢިއްޒަތު އާއި، މެންބަރު އަމްޖަދު ވަހީދު އާއި، މެންބަރު ޢަލީ ޔޫސުފް އާއި މެންބަރު އާމިނަތު އަމީނާއެވެ.
