ޅޮހިން އިތުރު 6 މީހަކު ކޮވިޑް-19 އަށް ފައްސިވެއްޖެ
ނ.އަތޮޅު ޅޮހިން އިތުރު 6 މީހަކު ކޮވިޑް-19 އަށް ފައްސި ވެއްޖެއެވެ. އެއާއެކު ޅޮހި ކްލަސްޓާއިން ވަނީ ޖުމްލަ 13 މީހަކު ފައްސި ވެފައެވެ.
ޅޮހިން އެންމެ ފުރަތަމަ ފައްސި ވެފައި ވަނީ ކަރަންޓީނުގައި ތިބި އާއިލާއެކެވެ. އެއަަށް ފަހު އެމީހުންނާ ބައްދަލުވި ކަރަންޓީނުގައި ނެތް ބަޔަކު ފައްސިވުމާއެކު ރަށް ވަނީ މޮނިޓަރިންގެ ހާލަތަށް ލާފައެވެ.
ކޮންޓެކްޓް ޓްރޭސިން ހަދައި އެރަށުން މިހާތަނަށް ޖުމްލަ 110 މީހެއްގެ ސާމްޕަލް ނަގާފައިވާއިރު، އޭގެ ތެރެއިން 58 މީހެއްގެ ނަތީޖާ ވަނީ ނައްސި ވެފައެވެ. އަދި 13 މީހުން ފައްސިވިއިރު، 39 މީހެއްގެ ނަތީޖާ އަދި ނުލިބެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައި ވަނީ މާލެއިން 85 މީހުންނާއި، އަތޮޅުތެރެއިން 10 މީހަކާއި، ހިންގަމުން އަންނަ ރިސޯޓުތަކުން 10 މީހުންނާއި އިންޑަސްޓްރިއަލް އައިލެންޑުން އެކަކެވެ.
މިހާރު ރާއްޖެއިން މިބައްޔަށް ޖުމްލަ 21،572 މީހުން ފައްސި ވެފައި ވެއެވެ.
