ފެނުގެ އަގު ވަޒަން ކުރުމަށް، އަގުހުރި އިނާމުތަކަކާއެކު ފޮޓޯ މުބާރާތެއް!
ފެނަކީ ވަރަށް މުހިންމު އެއްޗެއް އެހެން ނޫންތޯއެވެ؟ ފެނާ ނުލާ އެކަކަށް ވެސް ދިރި ނޫޅެވޭއިރު، ފެނުގެ އަގު ވަޒަން ކުރުމަކީ ވެސް މުހިންމު ކަމެކެވެ. އަދި އަހަރެމެންނަށް ފެން މުހިންމު ވަނީ ކިހިނެއްކަން ވެސް އެނގުން މުހިންމެވެ.
ފެނުގެ އަގު ވަޒަން ކުރުމާ ފެނުން ކުރެވޭ މުހިންމު ކަންތައްތައް މަންޒަރުތަކުން ދައްކުވައި ދެވޭނެ ރަނުގެ ފުރުސަތެއް މިވަނީ މިނިސްޓްރީ އޮފް އެންވަޔަރަމެންޓުން ހުޅުވާލާފައެވެ.
މިއަހަރުގެ ފެނުގެ ދުވަހުގެ ތީމަކީ "ވެލުއިންގ ވޯޓަރ" (ފެނުގެ އަގުވަޒަން ކުރުން) އެވެ. ދުނިޔޭގެ ފެނުގެ ދުވަހަކީ މާރިޗް މަހުގެ 22 ވަނަ ދުވަހެވެ. މިދުވަހާ ގުޅޭގޮތުން އެމިނިސްޓްރީން ވަނީ ވަރަށް ޚާއްސަ ފޮޓޯ މުބާރާތެއް ހުޅުވާލާފައެވެ.
މި މުބާރާތާއި ގުޅޭގޮތުން "ދެން" އަށް މައުލޫމާތު ދެއްވަމުން އެ މިނިސްޓްރީގެ ވޯޓަރ އެންޑް ސެނިޓައިޒޭޝަން ޑިޕާޓްމަންޓުން ސޮބާޙް ރަޝީދު ވިދާޅުވީ މިއީ މިމަހުގެ 15 އިން އަންނަ އޭޕްރިލް މަހުގެ 1 އާއި ހަމައަށް ކުރިއަށްދާނެ މުބާރާތެއް ކަމަށެވެ.
" ވެލުއިންގ ވޯޓަރ މި ތީމްގެ ދަށުން ހިންގޭ މުބާރާތެއް މި މުބާރާތުގައި ބައިވެރިވުމަށް ގޫގްލް ފޯމް ލިންކުގައި މައުލޫމާތުތައް ފުރިހަމަ ކުރުމަށް ފަހު އެ ފޯމު ފޮނުވާލާނީ. މިއީ ވަނަވަނަ ހޮވާ މުބާރާތެއް. އެގޮތުން އެއްވަނަ އަށް މިދެނީ ޑީއެސްއެލްއާރް ކެމެރާއެއް، ދެވަނަ އަށް ގޯޕްރޯ އެއް އަދި ތިންވަނަ އަށް ހާޑް ޑިސްކެއް" ސޮބާހް ވިދާޅުވިއެވެ.
ގޫގްލް ފޯމުގައި ހިމަނަން ޖެހެނީ މުބާރާތުގައި ބައިވެރިވާ ފަރާތުގެ ފުރިހަމަ ނަމާއި އުފަންވި ތާރީޚާއި އައިޑީ ކާޑު ނަންބަރުގެ އިތުރުން، އެމީހެއްގެ އީމެއިލް އެޑްރެސް، ގުޅޭނެ ނަންބަރެއް އަދި މުބާރާތުގައި ހިމަނާ ފޮޓޯގެ އިނގިރޭސިން ކުޑަ ތަފްސީލަކާއި ނަގާފައިވާ ލޮކޭޝަނެވެ.
މިމުބާރާތުގައި ބައިވެރިކުރަން ހިމަނާ ފޮޓޯތައް ހުންނަން ވާނީ ޖޭޕީޖީ ފޯމެޓަށް 2 އެމްބީ އަށްވުރެ ކުޑަ ނޫން އަދި 10 އެމްބީއަށްވުރެ މަތިނޫން ފޯމެޓެއްގައި ކަމަށް ވެސް އެންވަޔަރަމަންޓު މިނިސްޓްރީން ބުނެއެވެ.
މީގެއިތުރުން ފޮޓޯގެ ޑައިމެންޝަން ހުންނަން ވާނީ 1080×1080 އަށެވެ. އަދި ހިމަނާ ފޮޓޯއަކީ އެހެން މީހަކު ނަގާފައިވާ ފޮޓޯއަކަށް ނުވުމާއި އެއްވެސް މީހަކަށް ނުރުހުމެއް އޮންނަކަން ދޭހަވާ ފަދަ ފޮޓޯއަކަށް ނުވުން ވެސް މި މުބާރާތުގެ ޝަރުތު ތަކުގައި ހިމެނެވެ.
މި ފޮޓޯ މުބާރާތަށް ވަނަވަނަ ހޮވާނީ ފޮޓޯއަށް ލިބޭ ލައިކްއިންނާއި މުބާރާތް އިންސާފު ކުރަން ކަނޑައަޅާފައިވާ، އެ މިނިސްޓްރީގެ މުވައްޒަފުންނާއި ފޮޓޯގްރާފަރުންގެ ނިންމެވުމުގެ މައްޗަށް ބިނާ ކޮށް ކަމަށް ވެސް ސޮބާޙް ވިދާޅުވިއެވެ.
މި މުބާރާތުން ވަނަވަނަ ހޯދުމަށް އެއްވެސް ފަރާތަކުން މަކަރު ހަދައިފިނަމަ، އެމީހަކު މުބާރާތުން އެލިމިނޭޓް ވާނެ ކަމަށް ވެސް ވަނީ އެމިނިސްޓްރީން ބުނެފައެވެ.
ގޫގްލް ފޯމް ލިންކް: https://docs.google.com/forms/d/e/1FAIpQLScpZeg0f6uk82qGr0u4BIthg7A2Ccagp_du0_sUO0xFk863Ew/closedform
އިންސާފުވެރިކަމާއެކު ކުރިޔަށް ގެންދާ މުބާރާތަކަށްވާނެ ކަމަށް އުންމީދު ކުރަން….. ގިނަފަހަރަށް ރާއްޖޭގަ މިފަދަ މުބާރާތްތައް އޮންނަނީ ކޮޕްޓްވެނިމިފަ…