8،000 މީހުންނަށް ރީ-ރަޖިސްޓްރީ ވުމުގެ ފުރުސަތު އަލުން ދެނީ

އިތުރު 8000 މީހަކަށް ރީރެޖިސްޓާ ކުރުމުގެ ފުރުސަތު ވަރަށް އަވަހަށް ހުޅުވާލާނެ ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް ވިދާޅުވެއްޖެއެވެ.

Ads by Hajj Corporation

އީސީ ޝަރީފް ވިދާޅުވީ ރީ ރަޖިސްޓްރީ ވުމަށް ހުޅުވާލި ފުރުސަތުގައި ވޯޓުގެ ސައްޙަކަން ގެއްލޭ ފަދަ ގޮތަކަށް 8،000 މީހުން ރީ-ރަޖިސްޓްރީކޮށްފައި ވާތީ އެ އެންމެންނަށް އަލުން ރީ ރަޖިސްޓްރީ ވުމުގެ ފުރުސަތެއް ދިނުމަށް ނިންމާފައިވާ ކަމަށެވެ.

އަދި މި މީހުންނަށް އަލުން ރީރެޖިސްޓްރީ ވުމުގެ ފުރުސަތު ދިނުމަށް، މި ހަފްތާގެ ތެރޭގައި ހުޅުވާލާނެ ކަމަށް ވެސް ޝަރީފް ވިދާޅުވިއެވެ.

ރަށްވެހި ވެފައިވާ ތަން ނޫން އެހެން ތަނެއްގައި ވޯޓުލުމަށް އެދި 26،000 އަށް ވުރެ ގިނަ މީހުން ވަނީ ހުށަހަޅާފައެވެ.

ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމަށް ހުޅުވާލި ފުރުސަތުގައި 26750 މީހުން ފޯމު ހުށަހަޅާފައިވާ ކަމަށް އިލެކްޝަން ކަމިޝަންގެ ރައީސް އަހުމަދު ޝަރީފު ވަނީ މީގެ ކުރިން ވިދާޅުވެފައެވެ. މިއީ ކޮވިޑު-19 އާ ގުޅިގެން ފަސް ކުރެވުނު އިންތިހާބުގައި ރީރަޖިސްޓްރީވީ އަދަދަށް ވުރެ އިތުރު އަދަދެއް ކަމަށް ވެސް ޝަރީފް ވިދާޅުވިއެވެ.

އަންނަ އޭޕްރީލް މަހުގެ 10 ވަނަ ދުވަހު ބާއްވަން ނިންމާފައިވާ އިންތިހާބުގައި، ވޯޓްދެވޭ 272,480 މީހުންގެ ތެރޭގައި ހިމެނެނީ އަތޮޅުތަކުގެ ރައްޔިތުންގެ ތެރެއިން 220،981 މީހަކާއި މާލެ ސިޓީއަށް ނިސްބަތްވާ 51،499 މީހެކެވެ.

މިހާރު ވޯޓުލުމަށް ރަޖިސްޓަރީވެފައިވާ ތަނުގެ މަޢުލޫމާތު ކޮމިޝަނުގެ ވެބްސައިޓް (www.elections.gov.mv) އިން ޗެކް ކުރެވޭނެއެވެ. އަދި އެސް.އެމް.އެސް ((VR space IDNO Send to 1414 ކޮށްގެން ވެސް ޗެކް ކުރެވޭނެއެވެ.