ކޮވިޑް-19: ޚާއްސަ ހުއްދައިގެ ދަށުން ކުޅުދުއްފުއްޓަށް ދިޔަ މީހަކު ފައްސި ވެއްޖެ

ޚާއްސަ ހުއްދައިގެ ދަށުން ކުޅުދުއްފުއްޓަށް ދިޔަ ބިދޭސީއަކު މިއަދު ކޮވިޑް-19 އަށް ފައްސި ވެއްޖެއެވެ.

Ads by MWSC

އެނގިފައިވާ ގޮތުގައި އެމީހާ ރާއްޖެ އައިސްފައިވަނީ 72 ގަޑިއިރުނުވާ ޕީސީއާރު ނަތީޖާއަކާއެކުއެވެ. ނައްސި ޕީސީއާރު ނަތީޖާ އޮތްނަމަވެސް ރާއްޖެއިން ބޭރުން އައި މީހަކަށްވުމުން އެ މީހާގެ ސާމްޕަލް މާލެއިންވެސް ނެގި ކަމަށާއި މާލެއިން ނެގި ސާމްޕަލްގެ ނަތީޖާ ލިބުނީ އެ މީހާ ކުޅުދުއްފުއްޓަށް ދިޔަތާ ކުޑަވަގުތުކޮޅެއް ފަހުން ކަމަށް ކުޅުދުއްފުށީ ރީޖަނަލް ހޮސްޕިޓަލުން މަޢުލޫމާތު ދީފައިވެއެވެ.

ކުޅުދުއްފުއްޓަށް ގޮސް ނަތީޖާ ލިބުމާ ދެމެދު، އެމީހާ ގޮސްފައިވަނީ އެއަރޕޯޓުން ގެސްޓްހައުސްއަށް އެކަނި ކަމަށާއި އެ ވަގުތުތަކުގައި އޭނާ އުޅެފައިވަނީ ގައިޑްލައިނާ އެއްގޮތަށް ކަމަށް އޭނާއާ ހަވާލުވި ފަރާތާ ހަވާލާދީ ހޮސްޕިޓަލުން ބުނެފައިވެއެވެ.

އުމުރުން 28 އަހަރުގެ ބިދޭސީ މި ފިރިހެން މީހާ ކުޅުދުއްފުއްޓަށް ދިޔައީ އެރަށުގައި ހިންގާ ބޭކަރީއެއްގެ މެޝިނަކަށް ދިމާވި މައްސަލައެއް ހައްލުކުރުމަށެވެ. އެމީހާ މިހާރު ހުރީ ކަރަންޓީނު ގައެވެ.