އިންތިޚާބުގައި ތާއީދު ކުރާނީ ހަމައެކަނި އެމްޑީޕީ ކެނޑިޑޭޓުންނަށް: ރައީސް
ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި ތާއީދު ކުރައްވާނީ ހަމައެކަނި އެމްޑީޕީގެ ކެނޑިޑޭޓުންނަށް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
“ރަށްވެހި ފަތިސް” ކެމްޕެއިންގެ ރިނބުދޫ ޖަލްސާގައި ރައީސް ވިދާޅުވީ މި އިންތިޚާބުގައި އެމްޑީޕީގެ ޓިކެޓުގައި ނިކުންނަވާ ކެނޑިޑޭޓަކަށް ނޫން ކެނޑިޭޓަކަށް ތާއީދު ނުކުރައްވާނެ ކަމަށާއި އެގޮތަށް އެއްވެސް ރަށެއްގެ އެއްވެސް އެމްޑީޕީ މެމްބަރަކު އަމަލު ނުކުރެއްވުމަށް އެދިވަޑައިގަންނަވާ ކަމަށެވެ.
ރައީސް މިހެން ވިދާޅުވީ ރިނބުދޫގައި އެމްޑީޕީ ނޫން ކެންޑިޑޭޓަކަށް އެމްޑީޕީގެ ބައެއް މެމްބަރުން ތާއީދު ކުރައްވާ މައްސަލައެއް ފެންމަތިވުމާ ގުޅިގެންނެވެ.
"އަޅުގަނޑުގެ ފުރިހަމަ ތާއީދާއި އެހީތެރިކަން އޮންނާނީ ޕާޓީގެ ކެނޑިޑޭޓުންނަށް. އެގޮތަށް ކުރިހާ ބޭފުުންވެސް އަމަލުތައް ބެހެއްޓެވުން އެދެން. އިރާދަކުރެއްވިޔާ އެމްޑީޕީން އަޅުގަނޑުމެންނަށް މިހުރިހާ ގޮޑިތަކެއް ވެސް ލިބޭނެ." ރައީސް ވިދާޅުވިއެވެ.
މި ޖަލްސާގައި ދާއިރާއެއްގެ ކެނޑިޑޭޓަކު އެމްޑީޕީގެ ޓިކެޓްގައި ނިކުންނަވާ ކެންޑިޑޭޓަކަށް ނޫން އެހެން އެއްވެސް ކެނޑިޑޭޓަކަށް ތާއީދު ނުކުރެއްވުމަށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވެސް ވަނީ އެދިވަޑައިގެންފައެވެ.
