އިންޑިއާގެ އަންހެނުން "ފަޅާފައި ހުންނަ ޖީންސް" ލައިގެން ފޮޓޯ އަޕްލޯޑް ކުރާ ސަބަބު އެނގޭތަ؟
އިންޑިއާގައި ވަރަށް މަޝްހޫރު ވެގެން އުޅޭ ޓްރެންޑެކެވެ. ފައިކުރި ފަޅާފައި ހުންނަ ޖީންސާއެކު ނަގާ ފޮޓޯތައް މިއަދު މީސްމީޑިއާ ފުރާލާފައިވާއިރު، މިއީ ކިހިނެތް ހިނގި ކަމެއްތޯ ގިނަ ބަޔަކު ސުވާލު އުފައްދަމުން އެބަދެއެވެ.
މިކަންތަައް ފެށެން ދިމާވީ އިންޑިއާގެ ސަރުކާރު ހިންގާ ޕާޓީން އެޤައުމުގެ ސްޓޭޓެއް ކަމަށްވާ އުތުރަކަންޑަށް އަލަށް ކަނޑައެޅި ވަޒީރު، ޖަލްސާއެއްގައި ދެއްކެވި ވާހަކަފުޅަކާ ގުޅިގެންނެވެ. "ޒުވާން ހަރުދަނާ ޖީލެއް އުފައްދާނީ ކިހިނެތް" މި މަޢުލޫއަށް ވާހަކަފުޅު ދައްކަވަމުން މިނިސްޓަރ މިސާލެއް ވަނީ ނަންގަވާފައެވެ. މިގޮތުން ވިދާޅުވީ، އެންޖީއޯއެއް ހިންގަމުން ދިޔަ ފަރާތަކުން އޭނާއާ ދިމާވި ކަމަށާއި ނަމަވެސް އޭނާގެ ކިބައިން ފެނުނީ ރަނގަޅު ނޫން މިސާލެއް ކަމަށެވެ. މިގޮތުން ވިދާޅުވީ އެންޖީއޯއެއްގެ ރައީސާއެއް ތުރު ކުރައްވައިގެން ހުންނެވީ ފަޅާފައި ހުރި ޖީންސެއް ކަމަށާއި މިއީ ރަނގަޅު ނަމޫނާއެއް ނޫން ކަމަށް ވިދާޅުވިއެވެ.
މިއާއެކު އިންޑިއާގައި ވަނީ "ޖީންސް މޫވްމެންޓް" އެއް ފަށާފައެވެ. މިގޮތުން އިންޑިއާގެ އަންހެނުން ބުނަމުން ދަނީ ހެދުން އަޅަނީ ފިިރިހެނުންނަށް ދެއްކެން ނޫން ކަމަށާއި މިގޮތަށް މިނިސްޓަރ ދެކެވަޑައިގަންވާތީ ހިތާމަ ކުރާ ކަމަށެވެ. އަދި އިންޑިއާގެ ކުރީގެ އަސްކަރީ ބޭކަލުންނާއި ކަނބަލުން ވެސް ތިއްބަވަނީ ފައި ފެންނަ ގޮތަށް ސޯޓް ލައިގެން ކަމަށާއި އެއީ ނަމޫނާ ބޭކަލުން ކަމަށްވެސް ޓްވިޓަރގައި ވާހަކަ ދައްކަމުން އަންނަ ފަރާތްތަކުން ބުނެއެވެ.
ޓްވިޓަރގައި މިނިސްޓަރ ހޫނުފެނަށް ވެއްޓިފައިވާއިރު، މިކަމާ ގުޅިގެން ވަރަށް އަވަހަށް މަޢާފަށް އެދޭނެ ކަަމަށް އިންޑިއާގެ ނޫސްތަކުން ބުނެއެވެ.
