ކަންކަންމަތީ، މައިކާއެކު ކެމްޕޭނު ތަގްރީރު ނުދެވޭތީ ހިތާމަކުރަން: ރައީސް ނަޝީދު
އެހެން އިންތިހާބުތަކުގައި ކެމްޕެއިނު ކުރެއްވި ގޮތަށް، ކުރިއަށް އޮތް ލޯކަލް ކައުންސިލް އިންތިހާބުގައި ކެމްޕެއިނު ނުކުރެވޭތީ ހިތާމަ ކުރައްވާ ކަމުގައި ރައްޔިތުންގެ މަޖިލީހުގެ ރައީސް، އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ވާދަކުރާ ކެންޑިޑޭޓުންނަށް ހަމަ ފުރުސަތުތަކެއް ނެތް ކަމަށް ވިދާޅުވެ، އިދިކޮޅު ކޯލިޝަންގައި ހިމެނޭ ޕީއެންސީ އަށް ނިސްބަތްވާ، މާވަށު ދާއިރާގެ މެމްބަރު މުހައްމަދު ސައީދު ހުށަހެޅުއްވި މައްސަލައާ ގުޅިގެންނެވެ.
މިފަހަރުގެ އިންތިޚާބުގައި ކިތަންމެ ގިނަ ގޮންޖެހުންތަކެއް ހުރިނަމަވެސް އިންތިޚާބު ބޭއްވުމަކީ ވަރަށް މުހިންމު ކަމެއްކަން ފާހަގަ ކުރައްވައި ރައީސް ނަޝީދު ވިދާޅުވީ، މަޖިލީހުގެ މެމްބަރުން އުސޫލުތަކުގެ ތެރެއިން ކެމްޕެއިން ކުރަން ރަށްރަށަށް ދާން ބޭނުންނަމަ އެކަން ހަމަޖައްސަން ކުރަން ޖެހޭ ކަންކަން ކުރައްވާނެ ކަމަށެވެ.
"ކެމްޕެއިންގައި ކެމްޕެއިން ތަޤްރީރެއް ނުދެވޭ ކަމީ އަޅުގަނޑުވެސް ވަރަށް ހިތާމަ ކުރާކަމެއް. ވަރަށް ހިތަށް އަރާ ރަނގަޅަށް ކަންކަން މަތީގައި މައިކާ އެކުގައި މިމަސައްކަތް ހިންގޭނަމައޭ. ތިވިދާޅުވާ ގޮތްތަކަށް ހަމަހަމަ ފުރުސަތު ލިބިގެންދާނެ ނަމައޭ." ރައީސް ނަޝީދު ވިދާޅުވިއެވެ.
