14 އަހަރުގެ ކުއްޖަކު ރޭޕް ކުރި ކަމަށް ބުނާ މައްސަލައިގައި ހަމަނުޖެހުން ހިންގި 10 މީހަކު ހައްޔަރު ކޮށްފި
އުމުރުން 14 އަހަރުގެ ކުޑަ އަންހެން ކުއްޖަކު ރޭޕްކުރި ކަމަށް ބުނާ މައްސަލައިގައި ބަޔަކު ހިންގި ހަމަނުޖެހުމުގެ ތެރެއިން 10 މީހަކު ހައްޔަރު ކޮށްފިއެވެ.
މެދުރާއްޖެތެރޭގެ ރަށެއްގައި ހަމަނުޖެހުން ހިންގާފައި ވަނީ އުމުރުން 14 އަހަރުގެ ކުޑަ އަންހެން ކުއްޖަކު ރޭޕް ކޮށްފައިވާ ކަމަށް ބުނާ މައްސަލައިގައި، ތުހުމަތު އުފުލިފައިވާ ޓީޗަރު ފުލުހުން ހައްޔަރު ނުކުރުމުގެ ސަބަބުންނެވެ.
ޖިންސީ ގޯނާގެ މި މައްސަލައާ ގުޅިގެން ބަޔަކު ހަމަނުޖެހުން ހިންގާފައި ވަނީ ރ.މަޑުއްވަރީ ގައެވެ.
ފުލުހުން ވިދާޅުވީ މި ހަމަނުޖެހުމާ ގުޅިގެން ހައްޔަރު ކޮށްފައި ވަނީ މުޅިން ވެސް ދިވެހި ފިރިހެނުން ކަމަށާއި މި އެންމެން ވެސް ހައްޔަރު ކޮށްފައި ވަނީ ކޯޓު އަމުރެއްގެ ދަށުން ކަމަށެވެ. އަދި އެމީހުން ހައްޔަރުކުރީ ހަމަނުޖެހުން ހިންގާ، ދަޢުލަތުގެ މުދަލަށް ގެއްލުން ދީފައިވާތީ ކަމަށް ވެސް ފުލުހުން ވިދާޅުވިއެވެ.
މީގެ އިތުރުން ފުލުހުންނަށް ހަމަލާދިން މައްސަލައެއް ވެސް ތަޙުޤީގު ކުރަމުން ދާކަމަށް ފުލުހުން ވިދާޅުވެއެވެ.
ފުލުުހުން ވިދާޅުވީ މިމަހުގެ 3 ވަނަ ދުވަހު މެދުރާއްޖެތެރޭގެ ރަށެއްގައި 18 އަހަރު ނުފުރޭ އަންހެން ކުއްޖަކަށް ޖިންސީ ގޯނާ ކުރުމުގެ ޢަމަލެއް ހިންގާފައިވާކަމަށް ބުނާ މައްސަލައެއް މިމަހުގެ 11 ވަނަ ދުވަހު ހުށަހަޅާފައި ވާކަމަށެވެ. އަދި މި މައްސަލައިގައި ވަކި މީހެއްގެ މައްޗަށް ތުޙުމަތު ކުރެވޭ ހެކި މިހާތަނަށް ތަޙުޤީގަށް ލިބިފައި ނުވާކަމަށް ވެސް ވިދާޅުވެފައިވެއެވެ.
ނަމަވެސް މިމައްސަލަ އިތުރަށް ތަޙުޤީގު ކުރަމުންދާކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ މިފަދަ މައްސަލަތަކަކީ ނާޒުކު މައްސަލަތަކަކަށް ވާތީ، ހެކި ހޯދުމަށް ކުރާ މަސައްކަތްތަކުގެ ތަފްސީލަކީ ހާމަ ކުރެވޭނެ މަޢުލޫމާތެއް ނޫން ކަމަށެވެ.
