ކުޑަހުވަދޫގައި ކޮމިއުނިޓީ ސްޕްރެޑްއެއް އޮތް ކަމަށް ނުބެލެވޭ: ކައުންސިލް
ދ. ކުޑަހުވަދޫގައި އޮތީ ކޮމިއުނިޓީ ސްޕްރެޑްއެއް ކަމަށް ނުބެލެވޭ ކަމަށް އެރަށު ކައުންސިލުން ބުނެފިއެވެ.
އެއާޕޯޓް މުވައްޒަފުންތަކެއް ޕޮޒިޓިވްވެ، ކުޑަހުވަދޫ މޮނިޓަރިންއަށް ލާފައި ވަނީ މާޗް މަހުގެ 17 ވަނަ ދުވަހުއެވެ. އަދި އެ ރަށުގައި އާންމުންގެ ތެރޭގައި ކޮވިޑް-19 ފެތުރެމުން އަންނަކަމަށް ހެލްތު އިމަޖަންސީ އޮޕަރޭޝަން ސެންޓަރުން ވަނީ ބުނެފައެވެ.
އެހެން ނަމަވެސް ކުޑަހުވަދޫ ކައުންސިލްގެ ރައީސް އަހްމަދު ޝާމް ވިދާޅުވީ އެރަށުގައި ކޮމިއުނިޓީ ސްޕްރެޑްއެއް އޮތް ކަމަށް ނުބެލެވޭ ކަމަށެވެ. 1000 އަށް ވުރެ ގިނަ ސާމްޕަލް މިހާތަނަށް އެރަށުން ނެގިފައިވާއިރު ޝާމް ވިދާޅުވީ ރަށުގައި ކޮންމެވެސް ވަރަކަށް ރޯގާ އުޅޭކަން ފާހަގަކުރެވޭ ކަމަށެވެ.
ކުޑަހުވަދޫން ފައްސި ވެފައި ވަނީ 23 މީހުންނެވެ. އަދި އެރަށުގެ 153 ގެ ވަނީ މޮނީޓަރިންގެ ހާލަތުގައެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު އިއްޔެ ރާއްޖެއިން ކޮވިޑަށް ފައްސި ވެފައިވަނީ މާލެއިން 59 މީހުންނާއި، އަތޮޅުތެރެއިން 11 މީހަކާއި، ހިންގަމުން އަންނަ ރިސޯޓުތަކުން 10މީހަކާއި އިންޑަސްޓްރިއަލް އައިލެންޑުން 66 މީހެކެވެ.
