ފައްޔާޒު ރައީސް ނަޝީދަށް: މިއީ ނޯތު ކޮރެއާއެއް ނޫން، ޚުދުމުހުތާރު އުސޫލުން ކަންކަމެއް ނުކުރެވޭނެ
ރައްޔިތުން މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އާއި އިކޮނޮމިކް މިނިސްޓަރު ފައްޔާޒު އިސްމާއިލްއާ ދެބޭފުޅުން ބަހުގެ ހަމަލާތަކެއް ރައްދު ކުރައްވައިފިއެވެ.
ބަހުގެ ހަމަލާތައް ދެބޭފުޅުން ބަދަލު ކުރައްވާފައި ވަނީ އެމްޑީޕީގެ ގައުމީ މަޖިލީުގެ މެންބަރުން ތިއްބަވާ ވަޓްސްއެޕް ގުރޫޕެއްގައެވެ. މި ޗެޓްތަކުގެ ސްކްރީންޝޮޓްތަކެއް "ދެން"އަށް ވެސް ވަނީ ލިބިފައެވެ.
ގުރޫޕްގައި ރައީސް ނަޝީދު ވިދާޅުވެފައި ވަނީ ފައްޔާޒް ފޮރުވަން ކުރާ މަސައްކަތުން ރައީސް އިބްރާހިމް މުހައްމަދު ޞާލިހު ހަލާކު ވެދާނެ ކަމަށެވެ.
އެ މެސެޖަށް ރައްދު ދެއްވާ މިރޭގެ އިރާކޮޅުގެ ވަގުތެއްގައި ފައްޔާޒު ވިދާޅުވެފައިވަނީ އޭނާ ފޮރުވަން ނުޖެހޭނެ ކަމަށާއި މިއީ ނޯތު ކޮރިއާ ނޫން ކަމަށެވެ. އަދި މިގައުމުގައި ހުދުމުހުތާރު އުސޫލުން ކަންކަމެއް ނުކުރެވޭނެ ކަމުގައި ފައްޔާޒު ވަނީ ވިދާޅުވެފައެވެ.
އެއަށްފަހު އެ ގްރޫޕްގައި ތިއްބެވި އެހެން ބައެއް މެންބަރުން ވާހަކަ ދެއްކެވުމަށްފަހު އަނެއްކާވެސް ފައްޔާޒު ވަނީ ގުރޫޕަށް މެސެޖެއް ކުރައްވާފައެވެ. އެ މެސެޖުގައި ފައްޔާޒު ވިދާޅުވީ "އަޅުގަނޑުމެން ލައިގެން ތިބެވޭނީ ވަކިވަރަކަށް" ކަމުގައި ވެސް ފައްޔާޒު ވިދާޅުވިއެވެ.
މިކަމަށް ރައްދު ދެއްވާ ރައީސް ނަޝީދު ވިދާޅުވީ ތެދުވެވަޑައިގެން ހުންނެވީ އެމްޑީޕީގެ ތެރޭގައި ކޮރަޕްޝަން ހުއްޓުވުމަށް ކަމަށާއި ފައްޔާޒުއާ ދެކޮޅަށް ތެދުވުމަށް ލަދުގަންނަ ކަމަށެވެ.
ރައީސް ނަޝީދުގެ މި މެސެޖަށްފަހު ފައްޔާޒް ވިދާޅުވީ މިއީ އޭނާގެ ވެސް ޤައުމު ކަމަށެވެ. އަދި ޤައުމުގެ ކަންކަމާ ބަސް ވިދާޅުވާނެ ކަމަށާއި، އޭނާ ހުއްޓުވޭނެ އެހެން ބޭފުޅެއް ނުހުންނާނެ ކަމަށް ފައްޔާޒު ވިދާޅުވިއެވެ. އެ ވާހަކައަށް ރައްދު ދެއްވައި ރައީސް ނަޝީދު ގުރޫޕްގައި ލިޔުއްވާފައި ވަނީ ޤައުމަކީ ކާކުގެ ޤައުމެއްކަން އޮޅިވަޑައިގެން ނޫޅުއްވާ ކަމަށެވެ. އަދި ވާހަކަ ދެއްކެވީ ފައްޔާޒް އަމިއްލައަށް ކަމަށް ވެސް ރައީސް ނަޝީދު ވިދާޅުވިއެވެ.
ރައީސް ނަޝީދާއި މިނިސްޓަރު ފައްޔާޒުގެ ބަހުސް ހޫނުވެ ފައްޔާޒު ވަނީ އާންމުންނަށް ފެންނަ ގޮތަށް ވާހަކަ ދެއްކެވުމަށް ވަޑައިގެންނެވުމަށް ރައީސް ނަޝީދަށް ދައުވަތު އަރުވާފައެެވެ.
އެ ދައުވަތު ވަގުތުން ގަބޫލުކުރައްވާ، އެކަމުގައި ކުރިއަށް ވަޑައިގެންނެވުމަށް ގުރޫޕްގައި ރައީސް ނަޝީދު ލިޔުއްވުމާއެކު ފައްޔާޒު ވަނީ (އެކަމަށް) މާދަމާ ވެސް ރަނގަޅުކަމަށް ވިދާޅުވެފައެވެ. އެއަށްފަހު، ރައީސް ނަޝީދު ވިދާޅުވީ (ބަހުސް ކުރާނެ ތަނަކަށް) ޕީއެސްއެމް ރަނގަޅު ކަމަށެވެ. ނަމަވެސް ޕީއެސްއެމް އެކަނި ކަމުނުދާ ކަމަށް ވިދާޅުވެ، ހުރިހާ މީޑިއާއަކަށް ދައުވަތު ދެއްވުމަށް ފައްޔާޒް ވިދާޅުވިއެވެ.
