ދަނީ ރައްޓެހިންނާ ބައްދަލު ކުރަން، އެކަމަކު ތިބެވެނީ ފޯނަށް ގެއްލިފައި
ނަމުގައި ދަނީ ރަޙްމަތްތެރިންނާ ބައްދަލު ކޮށްލާ، އެމީހުންނާއެކު ވަގުތުކޮޅެއް ހޭދަ ކޮށްލާށެވެ.
ނަމަވެސް އެމީހުންނާއެކު ކޮފީއަކަށް ދިޔަސް ނުވަތަ ހިނގާލަން ދިޔަސް، އެންމެންނަށް ވެސް އެންމެ ގިނައިން ކުރެވޭ ކަމަކީ ފޯނާ ކުޅުމެވެ.
ރަޙްމަތްތެރިންނާ ދިމާވާ ވަގުތުން ފެށިގެން އެބައްދަލުވުން ނިމެންދެން ވެސް ފޯނުން އަތް ދޫ ނުކުރެވޭ މީހުން މަދެއް ނޫނެވެ. ގިނަ ފަހަރަށް މި ފަދަ މީހުންގެ ރަޙްމަތްތެރިން ވެސް ހަމަ އުޅެނީ މި ފަދައިންނެވެ. އެއް މޭޒެއްގެ ވަށައިގެން އެންމެން ތިބޭއިރު، ލޯތައް ގެއްލިފައި ވަނީ އެމީހެއްގެ މޮބައިލް ފޯނަށެވެ.
މީގެ އެންމެ މަޖާ އަނެއް ކަމަކީ، ވަރަށް ގިނަ ދުވަސް ފަހުން ރަޙްމަތްތެރިއަކާ ދިމާވުމުން އެންމެ ފުރަތަމަ ކުރެވޭ ކަމަކީ އެންމެން އެއްކޮށް ފޮޓޯއެއް ނެގުމެވެ. ދެން އެންމެ އަވަހަށް ކޮށްލާ ކަމަކީ "މެޓް އާފްޓާރ ސޯ ލޯންގް" ނުވަތަ "ހޭންގިންގ އައުޓް ވިތު..." ޖަހާފައި އެފޮޓޯ ސޯޝަލް މީޑިއާގައި އާއްމު ކުރުމެވެ. އާއްމުންނަށް އެފޮޓޯގެ ފުރިހަމަކަން ފެނުނަސް ފޮޓޯގެ ފުރަގަހުން ނުފެންނަ މަންޒަރަކީ، ފޮޓޯ ހަމަ ނެގުމާއެކީ އަނެއްކާ ވެސް ފޯނަށް ނަޒަރު ހިންގާ ހުރިހާ ސަމާލުކަމެއް ފޯނަށް ދެވޭ ކަމެވެ. ރައްޓެއްސަކާ ރައްޓެއްސެކެވެ. ފޮޓޯ އާއްމުކޮށް އެއަށް ލިބޭ "ލައިކްސް" ގުނުމާއި "ކޮމެންޓްސް" ކިޔުން މާ މުހިންމެވެ.
މި ފަދައިން ކަންތައް ކުރުމުން އެކަކު އަނެކަކާ އޮންނަ ގުޅުން ވަރަށް ބޮޑަށް ހީނަރު ވެއެވެ. ޙަޔާތުގައި ދިމާވާ އެކިއެކި ކަންތައްތައް ރަޙްމަތްތެރިޔާއާ ހިއްސާ ކޮށްލަން އައުމުން، އޭނާ އިންނަނީ ފޯނަށް ގެއްލިފައެވެ. މިގޮތަށް ކަންތައް ކުރުމުން ރަޙްމަތްތެރިޔާ ފޫހިވުމުގެ އިތުރުން، ތިމާ މީހާއަށް އޭނާ އެހާ މުހިންމެއް ނޫނޭ ހިތަށް އަރައި، އޭނާ ދައްކާ އެއްވެސް ވާހަކައެއް ވެސް ޙަޤީޤަތުގައި އަޑުއަހަން ބޭނުމެއް ނުވެއޭ ވެސް ހިތައް އަރާފާނެއެވެ. މީގެ އިތުރުން ދެން އެއްވެސް ވާހަކައެއް ޙިއްސާ ކުރަން ބޭނުން ވެސް ނުވެދާނެއެވެ.
މިފަދައިން ކަންތައް ކޮށްފައި، ފަހުން އޭނާ ބުނަން އުޅުން ވާހަކަ އެހެން ގޮތަކަށް ތިމާއަަށް އެނގުމުން، "އަހަރެން ކައިރީ ބުނެވެސް ނުލައޭ، އަންގާވެސް ނުލައޭ" ނުބުނާށެވެ. އެވާހަކަތަކަށް އެންމެ ފުރަތަމަ ޝައުޤުވެރިކަން ނުދިނީ ތިމާކަން ޤަބޫލު ކުރާށެވެ.
ފޯނަކީ ވެސް ދިރިއުޅުމުގައި މުހިންމު އެއްޗެކެވެ. ނަމަވެސް މީހަކާ ބައްދަލު ކުރާއިރު، ފޯނަށް ގެއްލުމަކީ ރަނގަޅު ކަމެއް ނޫނެވެ. އެމީހާ ވެސް ތިމާއާ ބައްދަލު ކުރަން އެ އަންނަނީ ވަގުތުތަކެއް ނަގައިލައިފައި ދަންނާށެވެ. އޭނާ ދޭ ވަގުތުކޮޅަށް އިހްތިރާމްކޮށް ތިމާވެސް އޭނާއަށް ރަނގަޅަށް ވަގުތު ދޭށެވެ. ވަރަށް މުހިންމު ކަމެއްގައި ނޫނީ، އެފަދަ ވަގުތުތަކުގައި ފޯނުގައި އަތް ނުލާށެވެ.
