މަސް ނިމުމުން ބާކީ ހުންނަ ޑޭޓާ އަނެއް މަހަށް ގެންދެވޭ ގޮތަށް އުރީދޫއިން ހަދަނީ
އުރީދޫގެ ޕޯސްޓްޕެއިޑް ކަސްޓަމަރުން އަޅާ ޑާޓާ މަސް ނިމުނު ކަމުގައިވީ ނަމަވެސް ޖެހިގެން އަންނަ މަހުގައި ބާކީ ބައި ލިބޭ ގޮތަކަށް އުސޫލެއް ހައްދަވާނެ ކަމަށް އެކުންފުނީގެ އެކްޓިންގ ޗީފް ކޮމާޝަލް އޮފިސަރ ހުސައިން ނިޔާޒު ވިދާޅުވެއްޖެއެވެ.
ރާއްޖެޓީވީގެ ''ފަށާއިރު'' ޕްރޮގްރާމްގައި އެކަމާ ގުޅޭގޮތުން ސުވާލު ކުރެއްވުމުން ނިޔާޒް ވިދާޅުވީ އެއީ ނުވާނެ ކަމެއް ނޫން ކަމަށާއި ނަމަވެސް އެއީ ވަރަށް ބޮޑު ކަމެއް ކަމަށެވެ. އަދި އުރީދޫ އަކީ އަބަދުވެސް ކަސްޓަމަރުންގެ އަޑު އަހައިގެން ޚިދުމަތްދޭ ބައެއް ކަމަށާއި މިމަހުން ފެށިގެން ޑޭޓާ އަނެއް މަހަށް ގެންދެވޭ އުސޫލެއް ހެދުމުގެ މަސައްކަތް ފައްޓަވާނެ ކަމަށް ނިޔާޒް ވިދާޅުވިއެވެ. އަދި ވިދާޅުވީ، ޕޯސްޓް ޕެއިޑް ޕްލޭންތަކަކީ 30 ދުވަހަށް ހަދާފައި ހުންނަ ޕެކޭޖްތަކެއް ކަމަށާއި ނަމަވެސް ބާކީވާ ޑޭޓާ އަނެއް މަހަށް ގެންދެވޭނެ ގޮތެއް ވޭތޯ ބައްލަވާނެ ކަމަށް އޭނާ ފާހަގަ ކުރެއްވިއެވެ.
"އަސްލު އަޅުގަނޑުމެން ޕޯސްޓްޕެއިޑް ޕެކޭޖްތައް ހަދާފައި މި ހުންނަނީ، 30 ދުވަހަށް ވާވަރަށް ހަދާފަ" ނިޔާޒް ވިދާޅުވިއެވެ. "އަޅުގަނޑުމެން ބަލާލަން މިކަން ކޮށްދެވޭތޯ، އޭޕްރީލް މަހުން ފެށިގެން އަޅުގަނޑުމެން ބަލާނަން މިކަންކޮށްދޭތޯ" ނިޔާޒް ވިދާޅުވިއެވެ.
މިއީ ބުނެފައި ނުކޮށް ދޫކޮށްލާނެ ކަމެއްތޯ ޕްރޮގްރާމްގެ ހޯސްޓް ތަކުރާރުކޮށް ސުވާލު ކުރުމުން ނިޔާޒް ވިދާޅުވީ، ކަސްޓަމަރުންގެ ހިތްމަރުވާ ކަމެއް އުރީދޫ އިން ނުކުރާނެ ކަމަށެވެ.
ބާކީވާ ޑޭޓާ އަނެއް މަހަށް ނުގެންދެވޭ މައްސަލަ ގިނަ ބަޔަކު ދައްކަމުންދާއިރު، މިބަދަލާއެކު ގިނަ ބައެއްގެ ޝަކުވާތަކަށް ހައްލެއް ލިބިގެންދާނެ ކަމަށް ލަފާ ކުރެވެއެވެ.
