16 އަހަރު ފުރުމުން ލައިސެންސް ދިނުމަށް މަޝްވަރާކޮށްފި

އުމުރުން 16 އަހަރު ފުރުމުން އެއްގަމު އުޅަނދު ދުއްވާ ލައިސަންސް ދިނުމަށް ގާނޫނަށް ބަދަލު ގެނައުމަށް މަޝްވަރާ ކޮށްފިއެވެ.

Ads by MWSC

ރައްޔިތުންގެ މަޖިލީހުގެ ޤަވައިދު ކޮމިޓީގައި ކަމާގުޅޭ ވުޒާރާއާއި މުއައްސަސާތައް ހާޒިރުކޮށްގެން ކުރިއަށް ގެންދިޔަ ކޮމިޓީ ބައްދަލުވުމުގައި މި މައްސަަލައިގައި ފުލުހުން ވިދާޅުވީ 18 އަހަރުން ދަށުގެ ގިނަ އަދަދެއްގެ ކުޑަކުދިން މިހާރުވެސް ލައިސެންސާ ނުލައި އެއްގަމު އުޅަނދު ދުއްވައިގެން ޖޫރިމަނާ ކޮށްފައިވާ ކަމަށާއި އޭގެ ތެރޭގައި އެންމެ ގިނައީ އުމުރުން 17 އަހަރުގެ ކުދިން ކަމަށެވެ. އެގޮތުން 2016 ވަނަ އަހަރުން ފެށިގެން މިހާތަނަށް އައިރު، މިފަދަ 336 ކުއްޖެއް ޖޫރިމަނާ ކޮށްފައިވާ ކަމަށް ފުލުހުން ވިދާޅުވިއެވެ.

މީގެ އިތުރު ފުލުހުން ވިދާޅުވީ ލައިސެންސް ޤަވައިދަށް އެންމެ ފަހުން ގެނައި އިސްލާހުގެ ދަށުން މިހާރު ލައިސެންސް ނުލައި ދުއްވާ ފަރާތް އެއް ހާސް ރުފިޔާއިން، އުޅަނދުގެ ވެރިފަރާތް ދެ ހާސް ރުފިޔާއިން އަދި އުޅަނދު 15 ދުވަހަށް ޓޯ ކުރުމުން މިފަދަ މައްސަލަތައް މަދުވަމުން އަންނަ ކަން ފާހަގަ ކުރެވިފައިވާ ކަމަށެވެ.

މި ބައްދަލުވުމުގައި ޓްރާންސްޕޯޓު މިނިސްޓްރީން ވިދާޅުވީ މި މައްސަލައިގައި ރައްޔިތުންނާ މަޝްވަރާކޮށް ރައްޔިތުންނަށް އެންމެ ފައިދާ ހުރި ގޮތެއް ހޯދުމަކީ މުހިންމު ކަމެއް ކަމަށެވެ.

އަދި 18 އަހަރުން ދަށުގެ ކުދިންގެ ޖޫރިމަނާގެ ކަންކަން ހައްލު ކުރުމަށް އެކުދިން މުޖުތަމަޢުއަށް ފައިދާހުރި ކަމެއް ކޮށްގެން ނުވަތަ ކޮމިއުނިޓީ ސަރވިސްގެ ގަޑިއިރު ފުރިހަމަ ކޮށްގެން ޖޫރިމަނާއިން ކެނޑޭ ގޮތަށް ޤަވައިދަށް އިސްލާހު ގެނެސް އަންނަ ހަފުތާގައި އޮޑިޓަރ ޖެނެރަލްއަށް ހުށަހަޅާނެ ކަމަށް ވެސް ފުލުހުން ވިދާޅުވިއެވެ.