ޅ އަތޮޅުގައި ކޮވިޑް ހާލަތު އަދި ހާސްވާންޖެހޭ ހާލަތާ ގާތަށްވެސް ނުދޭ: ރައީސް ނަޝީދު
ޅ.އަތޮޅުގެ ހުރިހާ ރަށެއްގައި ކޮވިޑް-19 ފެތުރުމުން އުފެދިފައިވާ ހާލަތު، ރައްޔިތުން ހާސްވާން ޖެހޭ މިންވަރަށް ނުދާކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ޅ. އަތޮޅުގައި ކޮވިޑްގެ ފައްސި ވޭދަނަތައް ށ.އަތޮޅުން ފުރަތަމަ ފެނުނީ ފެލިވަރުންނެވެ. އެ ރަށުން ފައްސިވި މީހުންގެ އަދަދު ވަނީ 300 އިން މައްޗަށް އަރާފައެވެ.
އަތޮޅުގެ ހުރިހާ ރަށްތަކުގައި ކޮވިޑް ފެތުރިފައިވާތީ އެ އަތޮޅުގެ ރައްޔިތުންނަށް ދިމާވެފައިވާ ނުރައްކާތެރި ހާލަތު ބަދަލު ކުރުމަށް އަވަސް ފިޔަވަޅުތަކެއް އަޅަން ގޮވާލާ، ނައިފަރު ދާއިރާގެ މެމްބަރު އަހުމަދު ޝިޔާމް މަޖިލީހަށް ހުށަހެޅުއްވި މައްސަލައަށް އިޝާރާތް ކުރައްވާ މަޖިލީހުގެ ރިޔާސަތުގައި އިންނަވާ މަޖިލީހުގެ ރައީސް ނަޝީދު ވިދާޅުވީ، ކޯވިޑް ޖެހިގެން އެ އަތޮޅުގެ އެއްވެސް ހޮސްޕިޓަލެއްގައި ސިއްހީ މަރުކަޒެއްގައި މީހަކު އެޑްމިޓްކޮށްފައި ނު ވާކަމަށެވެ.
"އަޅުގަނޑަށް ފެންނަ ފެނުމުގައި ހާސްކަމުގެ ތެރެއަށް ކުޑަކޮށް ވެސް މިކަމެއް ނުދޭ. އަޅުގަނޑު ދެކޭގޮތުގައި އެއީ އަޅުގަނޑު ފާހަގަކުރަން ޖެހޭނެ ކަމެއް." ރައީސް ނަޝީދު ވިދާޅުވިއެވެ.
މީގެ އިތުރުން ބ.އަތޮޅު ކޮވިޑް ފެސިލިޓީގައި ނައިފަރުގެ ދެމީހުންނާއި ފެލިވަރު ދެމީހުން އެޑްމިޓް ކޮށްފައި ވީ ނަމަވެސް އެރަށްތަކުގެ ހާލަތު ކަންބޮޑުވާންޖެހޭ ހާލަތަށް ނުދާ ކަމަށް ރައީސް ނަޝީދު ވިދާޅުވިއެވެ.
ޝިޔާމް ހުށަހެޅުއްވި މައްސަލައިގައި ވަނީ މަސްވެރިކަމުގެ މުހިއްމު މަރުކަޒެއް ކަމުގައިވާ ޅ.ފެލިވަރުގައި މަސައްކަތްކުރާ މުވައްޒަފުންގެ ތެރޭގައި ކޮވިޑު ފެތުރި ހުން އައިސްގެން އެތައް މުވައްޒަފުންނެއް އުޅުނުކަން އެ ރަށުގެ މެނޭޖުމެންޓަށް އެނގި އެ ކަން މުވައްޒަފުންނަށް ސިއްރު ކޮށްފައިވާ ކަން ފާހަގަ ކުރައްވާފައެވެ.
އަދި މާލެއިން އެކި ޓީމުތައް ޚާއްޞަ ހުއްދައިގެ ދަށުން އެކި ޓީމުތައް ފެލިވަރަށާއި އިތުރު ރަށްތަކަށް ދަތުރު ކޮށްފައިވާ ކަމަށާއި އެ ރަށްރަށުގައި ކޮވިޑް ފެތުރުމުގައި ސަރުކާރުގެ އިހުމާލު އޮތް ކަމަށް އަތޮޅުގެ ރައްޔިތުން ޤަބޫލުކޮށް ޝަކުވާ ކުރާ ކަމަށް ޝިޔާމް ހުށަހެޅުއްވި މައްސަލައިގައި ވިދާޅުވިއެވެ.
Ads by STO
