ތިލަދުންމަތީގައި ރިސޯޓު ވިޔަފާރި ނުކުރެވޭނެ އެއްވެސް ރަށެއް ނެތް: ރައީސް ނަޝީދު
ތިލަދުންމަތީގެ ރަށްތަކަކީ ގުދުރަތީ ވަސީލަތްތައް ގިނަ ،ރީތި ރަށްތަކެއް ކަމަށާއި އެރަށްތަކުން ރިސޯޓް ވިޔަފާރި ނުހިންގޭނެކަމަށް ބުނާނެ އެއްވެސް މީހެއް ނުހުންނާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ މޯލްޑިވްސް ޑިމޮކްރަޓިކް ޕާޓީ (އެމްޑީޕީ)ން ކުރިއަށް ގެންދާ ރަށްވެހި ފަތިސްގެ ސިލްސިލާ ބައްދަލުވުންތަކުގެ ތެރެއިން ހއ. ދިއްދޫއަށް ހާއްސަކޮށް ކުރިއަށް ގެންދިޔަ ޖަލްސާގައި ވާހަކަދައްކަވަމުންނެވެ.
އެ ގޮތުން އެ މަނިކުފާނު ވިދާޅުވީ ހަނިމާދޫ އިންޓަނޭޝަނަލް އެއަރޕޯޓަކީ ދެކުނު އޭޝިއާ ސަރަހައްދުގައި ފާހަގަކޮށްލެވޭ ފެންވަރުގެ އެއަރޕޯޓަކަށް ވުމުގެ ފުރުސަތު އޮތް އެއަރޕޯޓެއް ކަމަށެވެ. އަދި ތިލަދުންމަތީ ރައްޔިތުން އަމާޒު ހިފަންވީ ފައިދާ ވާނެ ގޮތަށް އެއަރޕޯޓް ހިންގޭނީ ކާކަށް ކޮން ގޮތަކަށްތޯ ބަލައި އެގޮތަށް ހިންގުން ކަމަށް ނަޝީދު ވިދާޅުވިއެވެ.
މީގެ އިތުރުން ތިލަދުންމަތީގެ ރަށްތަކަކީ ގުދުރަތީ ވަސީލަތްތައް ގިނަ ރީތި ރަށްތަކެއް ކަމަށާއި އެ ރަށްތަކުން ރިސޯޓް ވިޔަފާރި ނުހިންގޭނެކަމަށް ބުނާނެ އެއްވެސް މީހެއް ނުހުންނާނެ ކަން ފާހަގަކޮށް އެމަނިކުފާނު ވިދާޅުވީ ތިލަދުންމަތީގައި ރިސޯޓް ތަރައްގީކުރަން ރަށްތައް ވަރަށް ގިނައިން ދޫކުރެވިފައިވާ ކަމަށާއި މަދު ރަށެއް ނޫނީ ތަރައްގީކުރެވިފައި ނުވާއިރު، ރަށްތަކުގައި ރިސޯޓް ތަރައްގީ ނުވުމުގެ އެންމެ ބޮޑު ސަބަބަކީ ދަތުރުފަތުރުގެ ނިޒާމެއް ނެތުން ކަމަށެވެ.
